“ពិតប្រាកដណាស់ នៅក្នុងឋានសួគ៌ មានផ្សារមួយដែលពួកគេទៅជារៀងរាល់ថ្ងៃសុក្រ

ណាពី ﷺ លោកបានប្រាប់ថា ពិតប្រាកដណាស់ នៅក្នុងឋានសួគ៌ មានកន្លែងមួយដែលពួកគេជួបជុំគ្នានៅទីនោះ។ ពុំមានការទិញលក់អ្វីនៅទីនោះឡើយដោយពួកគេអាចយកអ្វីពីទីនោះតាមដែលពួកគេប្រាថ្នា ហើយពួកគេទៅទីនោះនូវរៀងរាល់ប្រាំពីរថ្ងៃម្តង។ នៅពេលនោះ មានខ្យល់បក់មកពីទិសខាងជើងមកប៉ះត្រូវមុខ និងសម្លៀកបំពាក់របស់ពួកគេធ្វើឲ្យពួកគេកាន់តែមានសម្រស់ស្រស់ស្អាតថែមទៀត។ នៅពេលដែលពួកគេត្រឡប់ទៅកាន់ក្រុមគ្រួសាររបស់ពួកគេវិញ ក្រុមគ្រួសាររបស់ពួកគេក៏កាន់តែមានសម្រស់ស្អាតឡើងដូចគ្នាដែរ។ ហើយក្រុមគ្រួសាររបស់ពួកគេបាននិយាយទៅកាន់ពួកគេថា៖ សូមស្បថនឹងអល់ឡោះ! បន្ទាប់ពីពួកអ្នកចាកចេញពីពួកយើងទៅ ពួកអ្នកពិតជាកាន់តែស្រស់ស្អាតឡើងៗ។ ពួកគេក៏បានតបវិញថា៖ ស្បថនឹងអល់ឡោះ ចំណែកពួកអ្នកវិញក៏ដូចគ្នាដែរ។ ពួកអ្នកក៏កាន់តែស្រស់ស្អាតឡើងៗដូចគ្នា។