ئه‌رێ ئه‌ز به‌رێ هه‌وه‌ نه‌ده‌مه‌ هنده‌ك كاران كو خودێ گونه‌هان پێ ژێدبه‌ت و پله‌یان پێ بلند دكه‌ت؟

پێغه‌مبه‌ری (صه‌لات و سه‌لامێن خودێ ل سه‌ر بن) پرسیار ژ صه‌حابییان كر كا ئه‌رێ وان دڤێت ئه‌و به‌رێ وان بده‌ته‌ هنده‌ك كریاران كو ببنه‌ ئه‌گه‌رێ ژێبرنا گونەهان و ژێبرنا وان د پەڕتووکێن وان مەلائیکەتێن کریارێن مرۆڤی تومار دکەن و بلندبوونا پله‌یان ل به‌حه‌شتێ؟

صه‌حابییان گۆت: به‌لێ مه‌ دڤێت. گۆت:

ئێك: ته‌مامكرنا ده‌ستنڤێژێ و گه‌هاندنا ئاڤێ بۆ هه‌می ئه‌ندامان د ده‌مێن ب زه‌حمه‌تدا؛ وه‌كی سه‌رمایێ، یان كێمبوونا ئاڤێ، یان ئێشانا له‌شی و ئاڤا گه‌رم.

دوو: گه‌له‌ك پێنگاڤ هاڤێتن بۆ چوونا به‌ره‌ڤ مزگه‌فتان؛ ب هندێ كو مالا مرۆڤی یا دویر بیت و مرۆڤ یێ به‌رده‌وام بیت ل سه‌ر چوونا مزگه‌فتێ.

سێ: چاڤه‌ڕێكرنا ده‌مێ نڤێژێ و گرێدانا دلی ب نڤێژێڤه‌ و به‌رهه‌ڤبوونا بۆ وێ و ڕوینشتنا د مزگه‌فتێڤه‌ بۆ چاڤەڕێکرنێ دا كو ب جه‌ماعه‌ت نڤێژێ بكه‌ت و پشتی نڤێژێ ژی ل وێرێ بمینیت بۆ نڤێژا دی.

پاشی پێغه‌مبه‌ری (صه‌لات و سه‌لامێن خودێ ل سه‌ر بن) دیار كر كو ئه‌ڤ كاره‌ ڕیباطا ب دروستاهینه‌‌‌؛ چونكی ڕێكێن شه‌یتانی ل به‌ر نه‌فسێ دگرن و حه‌ز و دلچوونان بنده‌ست دكه‌ن و ڕێكێ ل به‌ر وان دگرن كو وه‌سواسێ قه‌بویل بكه‌ن و ده‌رگه‌هی بۆ ڤه‌كه‌ن، ب ڤێ چه‌ندێ ژی كۆما خودێ دێ ب سه‌ر كۆما شه‌یتانی كه‌ڤن و ئه‌ڤه‌ جیهادا ژ هه‌مییان مه‌زنتره‌، ڤێجا ئه‌و وه‌كی زێره‌ڤانیكرنێیه‌ ل سه‌ر سنوورێن دوژمنی.