ئه‌رێ ئه‌ز هه‌وه‌ ئاگه‌هدار نه‌كه‌م ب باشترین كریارا هه‌وه‌ و پاقژترینا وان ل ده‌ڤ شاهێ هه‌وه‌ (كو خودێیه‌) و بلندترینا وان د پله‌یێن هه‌وه‌دا

به‌رده‌وامبوون ل سه‌ر زكرێ خودایێ مه‌زن ب دل و ب ئه‌زمان؛ ژ مه‌زنترین و بمفاترین كریارانه‌ ل ده‌ڤ خودایێ مه‌زن.
هه‌می كریارێن دی هه‌ما ب تنێ بۆ هندێ هاتینه‌ دانان دا كو زكرێ خودێ پێ بهێته‌ كرن، خودایێ مه‌زن گۆت: ((وَأَقِمِ الصَّلَاةَ لِذِكْرِي)) ئانكو: ((تو نڤێژێ بكه‌؛ دا بیرا من بكه‌ی))، پێغه‌مبه‌ری ژی صه‌لات و سه‌لامێن خودێ ل سه‌ر بن گۆت: ((إنَّما جُعل الطَّوافُ بالبيت وبين الصَّفا والمروة ورمي الجمار لإقامة ذكر الله تعالى)). ئانكو: ((هه‌ما طه‌وافا ل دۆر كه‌عبێ و چوونا د ناڤبه‌را صه‌فا و مه‌ڕوه‌یێ و هاڤێتنا به‌رێن جه‌مه‌راتان ب تنێ بۆ بیرئینانا خودایێ مه‌زن هاتینه‌ دانان)) رواه أبو داود والترمذي.
عززێ كوڕێ عه‌بدولسه‌لامی د (قه‌واعدا) خۆدا گۆتییه‌: ئه‌ڤ فه‌رمووده‌یه‌ ژ وان ده‌قانه‌ یێن نیشان دده‌ن و ئاماژه‌یێ دكه‌نه‌ سه‌ر هندێ كو خێر و خه‌لاتكرن ل سه‌ر ماندیبوونێ ناهێته‌ ئاڤاكرن د هه‌می عیباده‌تاندا‌، به‌لكی هنده‌ك جاران دبیت خودێ خێر و خه‌لاتێ كریاره‌كا كێم مه‌زنتر بده‌ت ژ كریاره‌كا گه‌له‌ك، ئانكو خێر و خه‌لاتكرن ل سه‌ر جوداهییا قه‌در و بهایێ عیباده‌تی دهێته‌ ئاڤاكرن.
مه‌ناوی د (فیض القدیر)ـێدا دبێژیت: ئه‌ڤ فه‌رمووده‌یه‌ ل سه‌ر هندێ هاتییه‌ كو زكر و بیرئینانا خودایێ مه‌زن باشترین كریار بوو بۆ وان كه‌سێن پێغه‌مبه‌ری (صه‌لات و سه‌لامێن خودێ ل سه‌ر بن) ل وی ده‌می ئاخڤتن د گه‌لدا دكر، و ئه‌گه‌ر ئه‌ڤ ئاخڤتنه‌ بۆ كه‌سه‌كێ چه‌له‌نگ و مێرخواس هاتبا كرن كو د شه‌ڕیدا مفا دگه‌هانده‌ ئیسلامێ، دا بێژیتێ: (جیهاد) باشترین كریاره‌. یان ئه‌گه‌ر بۆ زه‌نگینه‌كی گۆتبا یێ كو هه‌ژار مفای ژ مالێ وی وه‌ردگرن، دا بێژیتێ: (خێر و صه‌ده‌قه‌كرن) باشترینه‌. بۆ وی كه‌سێ دشێت حه‌جێ بكه‌ت، دا بێژیتێ: (حه‌ج)؛ یان بۆ وی كه‌سێ دایك و بابێن وی د ژیانێدا مابن، دا بێژیتێ: (قه‌درگرتن و خزمەتكرنا وان) باشترینه‌. ب ڤی ڕه‌نگی، هه‌می فه‌رمووده‌ د گه‌ل ئێك دگونجن و ناكۆكی د ناڤبه‌را واندا نامینیت.
زكرێ ژ هه‌مییان ته‌مامتر ئه‌وه‌ یێ ئه‌زمان بێژیت و دل تێبگه‌هیت، پاشی ئه‌و زكرێ ب دلی ب تنێ بیت وەکی هزرکرنێ، پاشی ئه‌و زكرێ ب ئه‌زمانی ب تنێ بیت و خێر یا د هه‌مییاندا هه‌ی‌ ب ئانه‌هییا خودایێ مه‌زن.
پێگیربوونا موسلمانی ب زكرێن ڕۆژانه‌ وه‌كی زكرێن سپێده‌ و ئێڤاری و یێن چوونا د ناڤ مزگه‌فتێ و مالێ و تاره‌تێ و ده‌ركه‌ڤتنا ژ وان جهان و ژ بلی ڤانه‌؛ دێ وی كه‌ته‌ ئێك ژ وان كه‌سان یێن گه‌له‌ك زكرێ خودێ دكه‌ن.