ب ڕاستی من هوین نه‌دانه‌ سویندێ ژ به‌ر كو ئه‌ز گومانێ ژ هه‌وه‌ ببه‌م و من باوه‌ری ب هه‌وه‌ نه‌بیت، به‌لێ جبریل هاته‌ ده‌ڤ من و گۆته‌ من كو خودایێ مه‌زن شانازییێ ب هه‌وه دبه‌ت‌ ل ده‌ڤ مه‌لائیكه‌تان

موعاویه‌یێ كوڕێ ئه‌بی سوفیانی (خودێ ژ هه‌ردووكان ڕازی بیت) چوو ده‌ڤ كۆمه‌كا خه‌لكی د مزگه‌فتێڤه‌ كو دیوانه‌ك بۆ خۆ چێكربوو، ڤێجا پرسیار ژ وان كر كا ئه‌و ژ به‌ر چ تشت كۆم بووینه‌. وان گۆت: ئه‌م یێ زكرێ خودێ دكه‌ین. ئینا موعاویه‌ی (خودێ ژێ ڕازی بیت) ئه‌و ب خودێ دانه‌ سویندێ كا ئه‌رێ مه‌ره‌ما وان ژ ڤێ روینشتنێ ب تنێ زكرێ خودێ بوویه‌. وان ژی سویند بۆ وی خوار. پاشی گۆته‌ وان: من هوین نه‌دانه‌ سویندێ ژ به‌ر هه‌بوونا گومانێ د ڕاستگۆییا هه‌وه‌دا، پاشی به‌حسێ پله‌ و جهێ خۆ ل ده‌ڤ پێغه‌مبه‌ری (صه‌لات و سه‌لامێن خودێ ل سه‌ر بن) كر و كو كه‌س وه‌كی وی یێ نێزیكی پێغه‌مبه‌ری (صه‌لات و سه‌لامێن خودێ ل سه‌ر بن) نه‌بوو؛ چونكی ئوم حه‌بیبه‌ یا خویشكا وی هه‌ڤژینا پێغه‌مبه‌ری (صه‌لات و سه‌لامێن خودێ ل سه‌ر بن) بوو، و ئه‌و ئێك ژ نڤیسه‌رێن وه‌حییێ بوو، د گه‌ل هندێ ژی ئه‌وی كێم فه‌رمووده‌ ڤه‌گوهاستینه‌. پاشی بۆ وان به‌حسێ هندێ كر‌ كو ڕۆژه‌كێ پێغه‌مبه‌ر (صه‌لات و سه‌لامێن خودێ ل سه‌ر بن) ژ مالا خۆ ده‌ركه‌ڤت و دیت صه‌حابییێن وی د مزگه‌فتێڤه‌ د ڕوینشتینه‌ و یێ زكرێ خودێ و سوپاسییا وی دكه‌ن ل سه‌ر ڕاسته‌ڕێكرنا وان بۆ ئیسلامێ و ئەو قەنجی یا دگەل وان کری، ئینا پێغه‌مبه‌ری (صه‌لات و سه‌لامێن خودێ ل سه‌ر بن) پرسیار ژ وان كر و ئه‌و دانه‌ سویندێ هه‌روه‌كی موعاویه‌ی (خودێ ژێ ڕازی بیت) ئه‌ڤه‌ د گه‌ل هه‌ڤالێن خۆ كری. پاشی پێغه‌مبه‌ری (صه‌لات و سه‌لامێن خودێ ل سه‌ر بن) ئه‌گه‌رێ پرسیار و دانه‌سویندا خۆ بۆ وان دیار كر: كو جبریل (سلاڤ لێ بن) هاته‌ ده‌ڤ وی و ئه‌و ئاگه‌هدار كرن كو خودایێ مه‌زن ل ده‌ڤ مه‌لائیكه‌تان په‌سنێن هه‌وه‌ دكه‌ت و شانازییێ ب هه‌وه‌ دکە‌ت و قەدر و بهایێ هەوە بۆ وان دیار دکەت و كریارێن هه‌وه‌ یێن باش نیشانی وان دده‌ت.