باد مه ښکنځئ (لعنت پرې مه وایئ)، نو کله چې داسې څه ووینئ چې نه‌ مو خوښېږي، دا دعا ووایئ: «اللَّهُمَّ إِنَّا نَسْأَلُكَ مِنْ خَيْرِ هَذِهِ الرِّيحِ وَخَيْرِ مَا فِيهَا وَخَيْرِ مَا أُمِرَتْ بِهِ، وَنَعُوذُ بِكَ مِنْ شَرِّ هَذِهِ الرِّيحِ وَشَرِّ مَا فِيهَا وَشَرِّ مَا أُمِرَتْ بِهِ». «اې الله! موږ ستا نه د دې باد خېر غواړو او هغه څه چې پکې دي، او د هغه څه خېر چې دې باد ته یې امر شوی، او پر تا د دې باد له شر څخه پناه غواړو او د هغه څه له شر نه چې پکې دی او له هغه شر نه چې دې باد ته یې امر شوی دی

د باد له ښکنځلو څخه منع شوې ده، ځکه چې باد یو مخلوق او د الله له لوري اداره کېدونکی (مدبَّر) شی دی، نو د هغې ښکنځل اصل کې د هغې خالق او مدبِّر ـ یعنې الله ـ ته ورګرځي، او دا کار په توحید کې (د انسان نېمګړتیا په ګوته) کوي.
الله تعالی ته رجوع کول، او د هغه د مخلوقاتو له شر نه هغه ته پناه وړل.
باد ته ممکن په خېر او یا شر رسولو امر شوی وي.
ابن باز رحمه الله ویلي: د باد ښکنځل له ګناهونو څخه شمېرل کېږي، ځکه دا یو مخلوق دی چې الله تعالی یې اداره کوي او د خېر او یا شر لپاره لېږل کېږي. نو ښکنځل یې روا نه دي چې وویل شي: "پر باد دې د الله لعنت وي"، یا "الله دې دا باد ورک کړي"، یا "الله دې بې برکته کړي" او داسې نور عبارتونه، بلکې مؤمن باید هماغسې وکړي چې نبي صلی الله علیه وسلم یې لارښوونه کړې ده.
د باد پر حکم د تودوخې، یخنۍ، لمر، دوړو او نورو هغو شیانو ښکنځل او سپکولو قیاس کېږي چې د الله مخلوق دي او د هغه له لوري اداره کېږي، نو دا ټول شیان باید ونه ښکنځل شي، ځکه د الله تعالی مخلوقات دي او د هغه تصرفات دي او پرې بد ویل یې د توحید خلاف عمل ګڼل کېږي.