مَنْ كَانَتْ لَهُ امْرَأَتَانِ فَمَالَ إِلَى إِحْدَاهُمَا، جَاءَ يَوْمَ الْقِيَامَةِ وَشِقُّهُ مَائِلٌ». "څوک چې دوه مېرمنې ولري او له دوی څخه یوې ته مایل شي، هغه به د قیامت په ورځ په داسې حالت کې راشي چې یو مخ به یې لوېدلی (ځوړند) وي

پر سړي واجب دي چې د خپلو مېرمنو تر منځ په وېش کې برابری مراعت کړي او دا پرې حرام دي چې د یوې په پرتله بلې ته په نفقې، استوګنې، نېک برخورد او داسې نورو شیانو کې مایل شي.
په وېش او داسې نورو کې برابری؛ په هغو چارو کې چې انسان یې واک ولري، خو د کومو چارو واک چې نه لري لکه مینه او د زړه میلان، هغه په دې حدیث کې نه راځي، دا هغه څه دي چې د الله تعالی په دې وینا کې راغلي دي: {ولن تستطيعوا أن تعدلوا بين النساء ولو حرصتم} النساء: 129]. ژباړه: او تاسو به كله هم (دا) وَس ونه لرئ چې د خپلو ښځو په منځ كې (په هر لحاظ سره او د زړه په مينه کې) انصاف وكړئ اګر كه تاسو (د دې) حرص (هم) وكړئ.
سزا د عمل له جنس څخه وي، کله چې سړی په دنیا کې له یوې ښځې څخه بلې ته مایله شي، نو د قیامت په ورځ به په داسې حال کې راشي چې یو مخ به یې له بل څخه مایل (ځوړند یا کوږ) وي.
د بندګانو د حقونو عظمت او دا چې چاته نه بخښل کېږي؛ ځکه چې په حرص او قصاص اخیستلو بنا دي.
په دین کې د نېمګړتیا راتلو له وېرې پر یوې ښځې بساینه د هغه چا لپاره مستحب دي چې له بې عدالتۍ وېره ولري؛ الله تعالی فرمایلي: {فَإِنْ خِفْتُمْ أَلَّا تَعْدِلُوا فَوَاحِدَةً} [النساء: 3]. خو كه له تاسې سره دا اندېښنه وي چې له هغو سره به عدالت ونه کړای شئ؛ نو يوه ښځه وكړئ.