မည်သူမ‌‌ဆို ကြက်သွန်ဖြူ သို့မဟုတ် ကြက်သွန်နီ စားထားပါက ငါကိုယ်တော်တို့နှင့် သီးခြားခွဲ၍နေလော့။ (သို့မဟုတ် ဤသို့ မိန့်ဆိုခဲ့သည်။) ငါကိုယ်တော်တို့ရဲ့ဗလီနှင့် သီးခြားခွဲ၍နေလော့။ မိမိရဲ့ အိမ်၌ပင် ထိုင်နေလော့

ကြက်သွန်ဖြူ၊ ကြက်သွန်နီ သို့မဟုတ် ကြက်သွန်မြိတ် စားထားသူအား ဗလီကျောင်းတော်သို့ လာရောက်ခြင်းမှ တားမြစ်ထားသည်။
ဤအရာများ၏ အမိန့်ပညတ်ချက်တွင် ဝတ်ပြုသူများစိတ်အနှောင့်အယှက် ဖြစ်စေသော အခြားသော မကောင်းသည့်အနံ့အသက်အားလုံးလည်း အကျုံးဝင်သည်။ ဥပမာ- စီးကရက်နှင့် ဆေးလိပ်သောက်ခြင်း စသည်တို့ ဖြစ်သည်။
တားမြစ်ရခြင်း၏ အကြောင်းရင်းမှာ မကောင်းသောအနံ့အသက်ပင်ဖြစ်သည်။ အကယ်၍ အပြင်းအထန် ချက်ပြုတ်ခြင်း သို့မဟုတ် အခြားနည်းလမ်းတစ်ခုခုကြောင့် အနံ့ဆိုးပျောက်သွားပါက၊ မနှစ်မြို့ဖွယ် အခြေအနေလည်း ပျောက်သွားပေမည်။
ဗလီသို့ လာရောက်၍ ဂျမာအသ်ဖြင့် ဆွလာသ်ဝတ်ပြုရန် တာဝန်ရှိသူအတွက် ဗလီတွင် ဂျမာအသ်ဖြင့် ဆွလာသ်ဝတ်ပြုခြင်း လက်လွတ်ဆုံးရှုံးခြင်း မဖြစ်စေရန် ထိုအရာများကို စားသုံးခြင်းသည် မနှစ်မြို့ဖွယ်ဖြစ်သည်။ သို့ရာတွင် တစ်စုံတစ်ဦးသည် ဂျမာအသ်ဖြင့် ဆွလာသ်ဝတ်ပြုခြင်းကို တာဝန်ကျရန် (မရှိတော့ရန် ) အကြောင်းပြချက်ဖြင့် ဤအရာများကို ရည်ရွယ် ချက်ရှိရှိ စားသုံးပါက၊ ထိုသူ့အတွက် ဤအရာများကို စားသုံးခြင်းသည် ဟရာမ် (တားမြစ်ထားသော) အဖြစ် သတ်မှတ်ခြင်းခံရမည်။
အလ္လာဟ်အရှင်မြတ်၏ တမန်တော်မြတ် (ဆွလ္လလ္လာဟုအလိုင်ဟိဝစလ္လမ်) သည် ဤအရာများကို စားသုံးခြင်းမှ ရှောင်ကြဉ်တော်မူခြင်းမှာ ယင်းတို့သည် ဟရာမ် (တားမြစ်ထားသော အရာ) များဖြစ်၍ မဟုတ်ပေ။ တမန်တော်မြတ် (ဆွလ္လလ္လာဟုအလိုင်ဟိဝစလ္လမ်) ရှောင်ကြဉ်ရခြင်းမှာ ကိုယ်တော်သည် (ဝဟီပို့သည့်) ကောင်းကင်တမန်ဂျိဗ်ရီလ် (အလိုင်ဟိစလာမ်) နှင့် စကားပြောဆိုတော်မူရသောကြောင့် ဖြစ်သည်။
တမန်တော်မြတ် (ဆွလ္လလ္လာဟုအလိုင်ဟိဝစလ္လမ်) ၏ ကောင်းမွန်လှပသော သင်ကြားနည်းစနစ်- အကြောင်းမှာ ကိုယ်တော်သည် အမိန့်ပေးရုံသာမက ယင်း၏အကြောင်း ရင်းကိုပါ ရှင်းလင်းဖော်ပြတော်မူခဲ့သည်။ ထိုသို့ဖြင့် ( ခိုင်းစေထားသည့် အမိန့်၏ )ဟိက်မသ် သဘောတရားကို နားလည်သဘောပေါက်ကာ နားထောင်သူ၏ စိတ်နှလုံးတွင် စိတ်ချမှုနှင့် လက်ခံမှုဖြစ်ပေါ်လာစေရန် ဖြစ်သည်။
ကာဿွီ အိယွာဿ်က ဤသို့ဆိုသည်- ပညာရှင်များသည် ဗလီမဟုတ်သည့် ဝတ်ပြုရာနေရာများအား ဥပမာ- အိဒ်ဆွလာသ်ဝတ်ပြုရာ (အီဒ်ဂါဟ်) နေရာ၊ ဂျနာဇဟ်ဆွလာသ် ဝတ်ပြုရာနေရာ၊ စသည့် လူစုလူဝေးဖြင့် ခဝပ်ကိုးကွယ်မှုပြုရာနေရာများကိုလည်း ဤဥပဒေသအတိုင်း ထည့်သွင်းစဉ်းစားကြသည်။ အလားတူပင် သာသနာ့ပညာရပ်များသင်ကြားရာနေရာများ၊ ဇိကိရ်ထိုင်ဝိုင်းများနှင့် ဝလီမဟ်ဧည့်ခံပွဲများကျင်းပရာ နေရာများကိုလည်း ဤအတိုင်း ထည့်သွင်းစဉ်းစားရမည် ဖြစ်သည်။ သို့သော် ဈေးများကဲ့သို့သော နေရာများသည် ဤသို့ ထည့်သွင်းစဉ်းစားမှုတွင် မပါဝင်ပေ။
ပညာရှင်များက ဆိုသည်- ဤဟဒီးဆ်သည် ကြက်သွန်ဖြူစသည်တို့ကို စားထားသူအား ဗလီကျောင်းတော်တွင် အခြားလူများ မရှိသည့်အချိန်၌ပင် ဝင်ရောက်ခြင်းမှ တားမြစ်ရမည်ဟူသော အထောက်အထားဖြစ်သည်။ အဘယ်ကြောင့်ဆိုသော် ဗလီကျောင်းတော်တွင် ကောင်းကင်တမန်များ ရှိနေတော်မူသောကြောင့်တည်း။ ထို့အပြင် ဟဒီးဆ်တော်များ၏ ယေဘုယျသဘောတရားကလည်း ဤသည်ကိုပင် ညွှန်ပြနေသောကြောင့်ဖြစ်သည်။