B na n wa balla fɩtnã-rãmbã nebã sũy, wala b sẽn balled pĩir n foogd-a moog-moogã

Muumin-rãmbã naaba, a ʿƲmar ɭbn Al-haṭṭaab, (Wẽnd yard be b yiibã yĩnga) a ra bee a zĩndgã zĩigẽ, tɩ sahaabsã (Wẽnd yard be b yĩnga) be ne-a, t'a yεεl-ba: Yaa ãna n wʋm Wẽnd Tẽn-tʋʋmã (Wẽnd pʋʋsg la A tɩlgr be a yĩnga) t'a gomd fɩtnã-rãmbã yelle? Tɩ sãnda yeele: tõnd wʋm-a lame t'a togsd fɩtnã wã, la a ʿƲmar yeele (Wẽnd yard be a yĩnga): tõeeme tɩ yãmb sẽn rat n yeel fɩtnã ninsã yaa raoa b sẽn zarbd-a a mengã la a koambẽ, la a pagbẽ, a sẽn nong-b keelem, la a sẽn tõe n maan beed n ka kõt-ba, la a sẽn tõe n maan soagl n bas-ba, tɩ yεl wʋsg põsg-ba, maa a sẽn na n maan yam yaal-yaale, n ka yik ne yεl sẽn sõmb ne-ba, sẽn yaa b hakε-rãmba la zʋglgo, la karengo, la woto b sẽn na n zarb ned n ges a yakẽ la sẽn wõnd rẽ, tõe tɩ yaa rẽnda la yãmb sẽn rat n goma wε? La b yeele: yaa woto. La a yeel yã: yẽnda yaa zarb-n-gesg sẽn sεt tɩ ned sã n geel a meng n na n gese, la zũnuub-rãmb n be beenẽ tɩ b tõe n yaaf ne tʋʋm sõma, wala Pʋʋsg la no-loeer la sara-rãmb maanego. La ãn n wʋm Nabiyaamã (Wẽnd pʋʋsg la A tɩlgr be a yĩnga) t'a gomd fɩtnã ning sẽn na n gũbg fãa gillã, a bedremã keelem la a sẽegrã waoogr yĩngã, n rãmbd wala mogr koom sẽn rãmbd to-to ningã? Tɩ nebã sĩndi, t'a Hʋzayfa ɭbn Al-Yamaan (Wẽnd yard be b yiibã yĩnga) yeele: mam wʋm-a lame. T'a ʿƲmar sũurã yɩ noogo, (Wẽnd yard be a yĩnga) t'a yεεl-a: Ad Wẽnd maan f baaba neer ne a sẽn rog fo buudã. T'a Hʋzayfa yeele: Nɑbiyɑɑmã yeelame (Wẽnd pʋʋsg lɑ A tɩlgr be ɑ yĩngɑ): Fɩtnã-rãmbã na n wa vẽnegame n tʋg n tablg ninsaal fãa sũurẽ, wala kãnkãr pĩir sẽn tabend ned ning sẽn gãe a zugã lʋgẽ, la a basd vũun sũurẽ wã a sẽn tablg-a wã keelem, la masɩɩb-kãngã a na n yɩlma noor wʋsgo, rẽnd sũur ninga a sẽn kẽ a pʋgẽ n yɩ a nonglem, n gẽdg-a wala bõn-yõodi gẽdgr la a kõom, b tẽkda a suurẽ wã sabelle, la sũur ning sẽn kɩɩs-a, (tõdg-a) b tẽkda beenẽ peelle, halɩ tɩ sũya wa lebg kõbg a yiibu: sũur sẽn yaa peelle, a sẽn loe lɩɩmaoongã la a sẽn tɩlg n yi bãasã keelem, tɩ fɩtnã-rãmbã ka tablg-a, n ka tall vũun a pʋgẽ, t'a lebg wala kug-saalg sẽn yaa pεεlga, bũmb ka tõe n tablg-a, rẽnd fɩtna ka tõe n nams-a, halɩ t'a wa yek Wẽnde. La sũur a yembrã, a kõbga toeemame n lebg sabelle, fɩtnã-rãmbã keelem, tɩ yaa wala koor sẽn kɩlle, maa sẽn fũgni, koom ka tõe n kẽ a pʋgẽ, yaa woto bal la sũ-kãngã, sõma buud ka yagend-a, yam sõng ka yagend-a, a ka mi sõma, a ka kɩɩsd wẽnga, sã n ka bũmb ning yẽ menga sẽn nong la a tar yamleoogã. La a Hʋzayfa yeela a ʿƲmar: ad fɩtnã-kãensã baa a yembr ka na n puk fo vɩɩmã pʋgẽ ye, la foom ne b sʋka, kʋɩleng n page, la keta bilf tɩ b kao-a. T'a ʿƲmar yeele: b na n kaoo kʋɩlengã kaoob sɩd-sɩdã? Ad b sã n rag n pak-a, tõe t'a lebg n page. La a Hʋzayfa yeel yã: Ayoo, a na n kaoogame, la ad kʋɩleng-kãngã yaa ned tɩ b kʋ-a maa a na n ki a toore. La m sẽn togsã, yaa sɩd sẽn yaa hakɩɩka, a ka yam rãmb n nidg pãng n yeel ye, ad yaa Nabiyaamã hadiisi, (Wẽnd pʋʋsg la A tɩlgr be a yĩnga.)