Ned ning sẽn wa n tʋg n bas a meng n yi tãng zug n lʋɩ, n kʋ a mengã, a bee Gεhannam Bugmã pʋgẽ, n lʋɩt a pʋgẽ, n yaa duumda n yaa paad a pʋgẽ lae-lae

Yaa sẽn harem tɩ ninsaal ra kʋ a menga, la a bee zũnuub bεdã pʋgẽ, a sõmba ne namsg sẽn zabde a yĩnga.
B sẽn togs bũmb ning hadiisã pʋgẽ wã, a yaa bilg-n-taar rɩkr ne yõorã kʋʋb kõbg sãnda, sã n ka rẽ, a sẽn wa n kʋ a mengã ne halhaal ning fãa b namsd-a lame wala a sẽn kʋ a mengã to-to ningã, la waa Al-bʋhaariy Gaf manegdgã pʋgẽ, Nabiyaamã (Wẽnd pʋʋsg lɑ A tɩlgr be ɑ yĩngɑ) koεεg sẽn yeele: "ned ning sẽn sãr a menga, a na n sãra a meng Gεhannamã pʋgẽ, la ned ning sen kõs a mengã, a na n kõs-a-la Bugmã pʋgẽ".
A An-nawawiy yeelame (Wẽnd na yols-a) la Nabiyaamã (Wẽnd pʋʋsg lɑ A tɩlgr be ɑ yĩngɑ) koεεgã sẽn yeel t'a (bee Gehannam Bugmã pʋgẽ, n duumd a pʋgẽ n paad a pʋgẽ lae-lae) wã; b yeela koees wʋsg a pʋgẽ: b yembre: tɩ woto yaa ned ning sẽn wa n maan-a n yeel tɩ sakdame n yaool n miẽ tɩ yaa haraam, rẽnd yẽ soabã yaa kɩfre, yãwã soabã bʋʋd la woto. Yiib soaba: tɩ b sẽn rat ne duumgã, yaa wakatã woglgo, la zĩndig ning sẽn na n woglã, la ad ka duumdg sɩd-sɩd ye, wala b sẽn yet: tɩ Wẽnd na duum Naabã Naam. Tãab soaba: Yaa tɩ woto la rolbo, la Wẽnde (A Naam yɩ wagell n zẽke,) A kõo kibare, tɩ ned ning sẽn ki ne lɩslaango, a ka duumd Bugmẽ wã ye.
Yãwã yaa sẽn na n mak laahr sɩbg-rãmbã ne dũni sɩbg-rãmbã, la b rɩkda a pʋgẽ, ninsaal sẽn na n maan a menga, a yaa wala a sẽn na n maan a to, a zũnuubã wεεngẽ, bala yẽ yõorã ka yẽnd n so ye, yaa Wẽnd n so, (A Naam zẽk yã), a ka tõe n maan a pʋgẽ, rẽnda bũmb ning Wẽnd sẽn kõ-a sorã.