m wẽena ne a Mʋhammad yõorã sẽn be Naab ning Nugẽ wã, ned pa wʋmd mam kibare sẽn be zamã-kãngã pʋgẽ, tɩ yaa Yahʋʋda tɩ yaa Nasaara, rẽ poorẽ t'a ki n ka kõ sɩd ne b sẽn tʋms maam ne bũmb ningã, rẽndame t'a yɩ Bugum biiga

A wilgda Nabiyaamã, (Wẽnd pʋʋsg la A tɩlgr be a yĩngɑ) tẽn-tʋmdã sẽn gũbg n tʋg dũni wã gillã, la a tũubã sẽn yaa tɩlae wã, la a sẽn yẽes sãri-rãmb nins sẽn reng taoorã.
Ned ning sẽn kɩfla ne Nabiyaamã, (Wẽnd pʋʋsg la A tɩlgr be a yĩngɑ) baa t'a sã n yag zĩri tɩ yẽ kõo sɩd ne nabiyaam-rãmb a taabã (Wẽnd pʋʋsg la A tɩlgr be b fãa gilli yĩnga) ka nafd-a ye.
Ned ning sẽn ka wʋm Nabiyaamã kibare, (Wẽnd pʋʋsg la A tɩlgr be a yĩngɑ), tɩ lɩslaamngã booll ka ta-a, yẽ soabã tara padanga, la a yellã dũni yikr raarã bee ne Wẽnde, (A Naam zẽkame).
Ned tõe n nafa ne lɩslaangã, baa t'a kũumã wa n pẽnegame, baa tɩ yaa bã-kεgeng zugu, sã n mikame t'a yõorã ka ta a koko-londẽ wã.
Wilgdame tɩ yeel tɩ kɩfr-rãmbã dĩin yaa sɩda- sẽn be b pʋgẽ me yaa Yahuud-rãmbã la Nasaar-rãmbã- rẽ yaa kɩfẽndo.
A pʋda Yahuud-rãmbã la Nasaar-rãmbã dĩin hadiisã pʋgẽ; tɩ yaa sẽn na n nek zẽng sẽn ka bãmb b yiibã, bala Yahuud-rãmbã la Nasaar-rãmbã rag n tara gafo, rẽnd sã n mikame tɩ bãmb yellã yaa woto, rẽnd neb nins sẽn ka tara-b gafã n yɩɩda, rẽnd b fãa gilli, yaa tɩlae tɩ b kẽ Wẽnd dĩinã pʋgẽ, la Nabiyaamã (Wẽnd pʋʋsg la A tɩlgr be a yĩngɑ) tũudum pʋgẽ.