Kẽng ne mam neood a yiibã woto wã, tɩ fo sẽn sεg ned ning lal-kãngã poorẽ t'a maan kaset tɩ soab ka be tɩ sã n ka Wẽnde, n tar bãng-n-wãak ne a sũurã, bɩ f noog a sũur ne Arzãna

Nɑbiyɑɑmã (Wẽnd pʋʋsg la A tɩlgr be a yĩnga) ra yɩɩme n zĩẽ, zãmã pʋgẽ, sahaabsã sʋka, a Abuu Bakr la a ʿƲmar rag n bee beenẽ, la Nɑbiyɑɑmã (Wẽnd pʋʋsg la A tɩlgr be a yĩnga) yikame n kaoos n ka wa ye, tɩ b yεεs tɩ bũmb na n wa maan-a, wala bεεbã, maa b yõk-a maa zẽng sẽn ka rẽnda. Tɩ Sahaabsã (Wẽnd yard be b yĩnga) yiki, tɩ b yaa sẽn yεεse, la sẽn reng n yεεs n yikã, yaa a Abuu Hʋrayrat (Wẽnd yard be a yĩnga), a tʋg n pɩʋʋga zẽed pʋʋg sẽn yaa Banii Nagεεd-rãmb pʋʋgo, n gilg tɩ sãnde a na yã ragnoor n kẽ, la a ka yã ye, la a yãa võor sẽn yaa kɩdg lalgẽ wã, tɩ koomã tũud bẽenẽ n kẽedẽ, t'a põd a yĩngã n paam n kẽ, n mik tɩ Nɑbiyɑɑmã (Wẽnd pʋʋsg la A tɩlgr be a yĩnga) bee beenẽ, t'a yεεl-a: yaa foom a Abaa Hʋrayrat bɩɩ? La a yeele: n-yee. La a yeel yã: yaa bõe n tar foom? A Abuu Hʋrayrat yeele: fo ra bee tõnd sʋka, n yik la fo kaoosame tɩ tõnd yεεsd tɩ bũmb na n wa maan-f tɩ d ka bãng ye, la maam la rẽenem sẽn yεεse, tɩ mam wa gilgd pʋʋgã lalga, tɩ mam põd wala waag sẽn põtã, la nebã bee mam poorẽ. Tɩ Nɑbiyɑɑmã (Wẽnd pʋʋsg la A tɩlgr be a yĩnga) kõ-a a neood a yiibã, tɩ yaa sẽn wilgdi la tagmase t'a togsgã yaa sɩda, N yεεl-a: kẽng ne mam neoodã a yiibã, ned ning fo sẽn yek lal-kãngã poorẽ, n maan kaset tɩ "laa ɩlaaha ɩllaa Allaah= soab sẽn na n tũ sɩd-sɩd ka be, sã n pa yɩ ne Wẽnde" la b sẽn sõmb n tũ ne sɩd ka be rẽnda Wẽnde, t'a sũurã yaa sẽn bãng n wãag ne rẽ, ned ning sẽn wa n yaa woto, ad a yaa arzãn neda. La rẽenem mam sẽn seg yaa a ʿƲmar t'a yeele: yaa bõe neood a yiib la woto, Abuu Harayrat? Tɩ mam yeel: bãmbã b yiibã yaa Wẽnd Tẽn-tʋʋmã neooda (Wẽnd pʋʋsg la A tɩlgr be a yĩnga) a tʋmsa maam ne-ba, tɩ ned ninga m sẽn sege, t'a maam kaset tɩ : "laa ɩlaaha ɩllaa Allaah= soab sẽn na n tũ sɩd-sɩd ka be, sã n pa yɩ ne Wẽnde" n yaa sẽn bãng n wãag ne a sũurã, bɩ m kõ-a sũ-noogr ne arzãna. T'a ʿƲmar (Wẽnd yard be a yĩnga), wẽ a Abuu Hʋrayrat yãoogã, t'a lʋɩ a sẽegã zugu, n yεεl-a: Abuu Hʋrayrata, lebge, tɩ mam lebg n kẽng Nɑbiyɑɑmã nengẽ (Wẽnd pʋʋsg la A tɩlgr be a yĩnga), tɩ mam yaa sẽn yεεse, tɩ mam nengã yaa sẽn toeeme, n rat n na n kũme, la a ʿƲmar pʋga maam n kẽn mam poorẽ wã n wa. Tɩ Nɑbiyɑɑmã (Wẽnd pʋʋsg la A tɩlgr be a yĩnga) yeele: yaa bõe n tar foom Abaa Hʋrayrat? Tɩ maam yeele: m sega a ʿƲmar n kõ-a kibar ne gomd ning fo sẽn tʋms maam ne wã, t'a wẽ mam yãoogã, tɩ mam lʋɩ m sẽengã zugu, la a yeel tɩ m lebge. Tɩ Nɑbiyɑɑmã yeele (Wẽnd pʋʋsg la A tɩlgr be a yĩnga): ʿƲmar, yaa bõe n kɩt tɩ fo maan woto? A ʿƲmar yeele: Wẽnd Tẽn-tʋʋma, mam saamb la m ma rɩkd n yaoome n põsg fo yõorã, foom n tʋms a Abuu Hʋrayrat ne neood a yiibã, t'a sẽn seg ned ning t'a maan kaset tɩ soab ka be tɩ sã n ka Wẽnde, n tar bãng-n-wãak ne a sũurã, bɩ a noog a sũur ne arzãna? Nabiyaamã yeele: n-yee. A ʿƲmar yeele: Bɩ f ra maan woto ye, tɩ ad mam yεεsda nebã wa teeg rẽ, n ka tʋm ye, bas-b tɩ b tʋme. Tɩ Nɑbiyɑɑmã yeele (Wẽnd pʋʋsg la A tɩlgr be a yĩnga): sã n yaa woto bɩ f bas-ba.