„Фитните ќе бидат изложувани на срцата – една по една – како што се редат прачките на сламен рогоз

Владетелот на верниците, Омер бин ел-Хатаб, Аллах нека е задоволен со него, седел со група асхаби, Аллах нека е задоволен со нив и им рекол: „Кој од вас го слушнал Божјиот пратеник, салаллаху алејхи ве селем, како зборува за фитните (искушенијата)?“ Некои од нив одговориле:
„Ние го слушнавме како зборува за нив.“ Тогаш Омер рече: „Можеби мислите на искушенијата што му се случуваат на човекот во неговото најблиско опкружување – со сопругата и децата – поради преголема љубов, претерана грижа или поради тоа што го одвлекуваат од добрите дела. Или пак мислите на запоставување на обврските кон нив: воспитувањето, поучувањето и исполнувањето на нивните права. Исто така, можеби мислите на искушението со соседот и слично?“ Тие одговорија: „Да.“ Омер рече: „Таквите фитни бараат пресметка, а дел од нив се гревови кои се бришат со добрите дела како намазот, постот и садаката. Но, кој од вас го слушнал Пратеникот, салаллаху алејхи ве селем, како зборува за општите фитни, заради нивната големина и распространетост, што го вознемируваат народот како што брановите ја разбрануваат морската површина?“ Луѓето замолчеа, а Хузејфе бин Јеман, Аллах нека е задоволен со него и со неговиот татко, рече: „Јас го слушнав.“ Омер, Аллах нека е задоволен со него, се израдува и му рече:
„Аллах да те награди – навистина си достоен син на својот татко – кажи!“ Тогаш Хузејфе рече: „Божјиот пратеник, салаллаху алејхи ве селем, рече: Фитните ќе му бидат изложени на срцето – една по една – како што се редат прачките на сламен рогоз, и ќе се лепат за неговите страни. Ако срцето ги прими – ќе се впијат во него како пијалак – и ќе се втисне во него една црна точка. А ако ги одбие – ќе се втисне бела точка. Со текот на времето, срцата ќе се поделат на два вида:

– Бело срце, чисто и цврсто во иманот – срце што фитната не го допира, како мазен камен на кој ништо не се задржува – и тоа срце нема да биде повредено од ниедна фитна сè додека не го сретне Аллах. – Црно и искривено срце – затемнето и превртено/накосо поставено како сад што не задржува вода – таквото срце не препознава добро, ниту одбива зло, освен она што му го диктира неговата страст.“ Потоа Хузејфе му рече на Омер:
„Меѓу тебе и тие фитни има една врата – и наскоро таа ќе биде скршена.“ Омер праша:
„Скршена?! Зарем не може само да се отвори, па повторно да се затвори?“ Хузејфе одговори: „Не – таа ќе биде скршена.“ И му објасни дека таа врата е човек – кој ќе биде убиен или ќе умре. Потоа рече: „Тоа што ти го пренесов не е претпоставка, ниту земено од луѓето на Книгата, ниту е плод на лично мислење – туку е сигурна, вистинита вест што ја слушнав од Божјиот пратеник, салаллаху алејхи ве селем.“