ئه‌جنه‌ ڤێ په‌یڤا ڕاست و دروست (ژ ئه‌سمانان) دبه‌ت و پاشی وه‌كی قدقدا مریشكێ دبه‌ت و دكه‌ته‌ د گوهێ هه‌ڤالێ خۆدا (كو كاهن و فالگرن یێن كو بانگه‌شه‌یا زانینا غه‌یبێ دكه‌ن)، ئه‌و ژی زێده‌تر ژ سه‌د دره‌وان تێكه‌لی وێ په‌یڤا ڕاست و دروست دكه‌ن))

ده‌رباره‌ی وان كه‌سێن ده‌نگوباسی ب تشتێن غه‌یبی ل پاشه‌ڕۆژێ دده‌ن پرسیار ژ پێغه‌مبه‌ری (صه‌لات و سه‌لامێن خودێ ل سه‌ر بن) هاته‌ كرن، ئینا پێغه‌مبه‌ری (صه‌لات و سه‌لامێن خودێ ل سه‌ر بن) گۆت: چ پویته‌ و گرنگییێ ب وان نه‌ده‌ن و ئاخڤتنێن وان وه‌رنه‌گرن و بلا بابه‌تێ وان ل ده‌ڤ هه‌وه‌ یێ گرنگ نه‌بیت و سه‌رنجا هه‌وه‌ ڕانه‌كێشیت.

وان گۆت: هنده‌ك جاران ئاخڤتنا وان د گه‌ل ژیواری (واقعی) دگونجیت و دهێته‌ڤه‌، وه‌كی بۆ نموونه‌ دێ بێژن فلان تشت كو بابه‌ته‌كێ غه‌یبییه‌ دێ ل فلان هه‌یڤێ و د فلان ڕۆژێدا ڕویده‌ت، پشتی هنگی وه‌كی وان گۆتی دێ هێته‌ڤه‌ و دێ چێبیت.

ئینا پێغه‌مبه‌ری (صه‌لات و سه‌لامێن خودێ ل سه‌ر بن) گۆت: ئه‌جنه‌ وی ده‌نگوباسێ ل ئه‌سمانی گوهلێ بووی ژبه‌ر دكه‌ن، پاشی بۆ هه‌ڤالێن خۆ ژ كاهن و فالگران دئیننه‌ خوار، ئه‌و كاهن سه‌د دره‌وان ل سه‌ر ڤی تشتێ ل ئه‌سمانان گوهلێ بووی زێده‌ دكه‌ت.