((ئه‌ز ب وی كه‌مه‌ یێ نه‌فسا من د ده‌ستیدا، نێزیكه‌ كوڕێ مه‌ریه‌مێ (عیسا) د ناڤ هه‌وه‌دا بهێته‌ خوار وه‌ك دادوه‌ره‌كێ دادپه‌روه‌ر، ڤێجا دێ خاچێ شكێنیت، دێ به‌ڕازی كوژیت، دێ زێڕه‌سه‌رێ (جزیێ) ڕاكه‌ت و ناهێلیت و مال و سامان ژی دێ هند زێده‌ بیت هه‌تا وی ڕاده‌ی كه‌س وه‌رناگریت))

پێغه‌مبه‌ر (صه‌لات و سه‌لامێن خودێ ل سه‌ر بن) سویند دخۆت ل سه‌ر نێزیكبوونا هاتنه‌خوارا عیسایێ كوڕێ مه‌ریه‌مێ (سلاڤ لێ بن) دا كو ب دادپه‌روه‌ری و ب شه‌ریعه‌تێ موحه‌ممه‌دی (صه‌لات و سه‌لامێن خودێ ل سه‌ر بن) بڕیارێ د ناڤبه‌را خه‌لكیدا بدەت، ئه‌و دێ وێ خاچێ شكێنیت یا فه‌له‌ ب مه‌زن ڕادگرن، هه‌روه‌سا عیسا (سلاڤ لێ بن) دێ به‌ڕازی كوژیت، كا چاوا ئه‌و (سلاڤ لێ بن) دێ زێڕه‌سه‌رێ ژ ناڤ خه‌لكی ڕاكه‌ت و دێ خه‌لكی هه‌مییێ هانده‌ت بهێنه‌ د ناڤ ئیسلامێدا. مال و سامان ژی دێ هند زێده‌ بیت هه‌تا وی ڕاده‌ی كه‌س وه‌رناگریت ژ به‌ر زه‌نگینییا خه‌لكی و هاتنه‌خوارا به‌ره‌كه‌ت و خێرێن زێده‌.