زه‌لامه‌ك هاته‌ ده‌ڤ پێغه‌مبه‌ری (صه‌لات و سه‌لامێن خودێ ل سه‌ر بن) و ده‌رباره‌ی كاره‌كی د گه‌ل ئاخڤت، پاشی گۆت: ئه‌وا خودێ بڤێت و ته‌ بڤێت. ئینا پێغه‌مبه‌ری (صه‌لات و سه‌لامێن خودێ ل سه‌ر بن) گۆت: ((ئه‌رێ ته‌ ئه‌ز كرمه‌ هه‌ڤئاست و شریك بۆ خودێ؟ بێژه‌: ئه‌وا خودێ ب تنێ بڤێت))

پاشڤه‌برن ژ گۆتنا: "ئه‌وا خودێ بڤێت و ته‌ بڤێت" و هه‌ر تشتێ وه‌كی وێ كو پیتا (واو) تێدا بیت بۆ هه‌ڤئاستكرنا ڤیانا عه‌بدی د گه‌ل ڤیانا خودێ، چونكی ئه‌ڤه‌ شركا بچویكه‌.
پێدڤییه‌ مرۆڤ خرابییێ ڕه‌د بكه‌ت و پێ ڕازی نه‌بیت.
پێغه‌مبه‌رێ خودێ (صه‌لات و سه‌لامێن خودێ ل سه‌ر بن) سنوورێن ته‌وحیدێ پاراستینه‌ و ڕێك ل به‌ر هه‌می جۆرێن شركێ گرتییه‌.
ل ده‌مێ ڕه‌دكرنا كاره‌كێ خراب یان ئاخڤتنه‌كێ؛ باشتره‌ مرۆڤ پێگوهۆڕكه‌كێ حه‌لال و دروست نیشا كه‌سێ به‌رامبه‌ر بدەت، ئه‌ڤه‌ ژی وه‌ك چاڤلێكرن بۆ پێغه‌مبه‌ری (صه‌لات و سه‌لامێن خودێ ل سه‌ر بن).
كۆمكرن د ناڤبه‌را گۆتنا پێغه‌مبه‌ری (صه‌لات و سه‌لامێن خودێ ل سه‌ر بن) د ڤێ فه‌رمووده‌یێدا: "ئه‌وا خودێ ب تنێ بڤێت"، و گۆتنا وی د فه‌رمووده‌یه‌كا دیدا: "بێژه‌: ئه‌وا خودێ بڤێت، پاشی ته‌ بڤێت" یا ب ڤی ڕه‌نگییه‌: گۆتنا "ئه‌وا خودێ بڤێت پاشی ته‌ بڤێت" یا دروسته، به‌لێ گۆتنا "ئه‌وا خودێ ب تنێ بڤێت" باشتره‌.
دروسته‌ تو بێژی: "ئه‌وا خودێ بڤێت پاشی ته‌ بڤێت"، به‌لێ یا باشتر ئه‌ڤه‌یه‌ تو بێژی: "ئه‌وا خودێ ب تنێ بڤێت".