((چ خێر و صه‌ده‌قه‌كرن مالی كێم ناكه‌ن، عه‌بد ب لێبوورینا ل خه‌لكی مه‌زنتر و ب قه‌درتر لێ دهێت و هه‌ر گاڤا كه‌سه‌ك ژ به‌ر خودێ خۆ بشكێنيت؛ خودێ دێ وی كه‌سی بلند كه‌ت))

پێغه‌مبه‌ر (صه‌لات و سه‌لامێن خودێ ل سه‌ر بن) دیار دكه‌ت كو خێر و صه‌ده‌قه‌كرن مالی كێم ناكه‌ن، به‌لكی به‌لا و موسیبه‌تان ل سه‌ر خودانی لادبه‌ن و خودێ دێ خێره‌كا مه‌زن ژ پێش ڤێ خێرا وی كری ده‌تێ، ب ڤێ چه‌ندێ ژی دێ بیته‌ ئه‌گه‌رێ زێده‌بوونا مالی نه‌ كێمبوونا وی.

كا چاوا ئه‌گه‌ر مرۆڤی شیانێن تۆلڤه‌كرنێ یان گازنده‌كرنا ژ كه‌سێ به‌رامبه‌ر هه‌بن، د گه‌ل هندێ ژی لێ ببووریت، ئه‌ڤ لێبوورینه‌ ژی دێ هێز و قه‌درێ مرۆڤی زێده‌تر لێ كه‌ت.

هه‌ر گاڤا مرۆڤی خۆ كێم كر و خۆ شكاند، ئه‌ڤه‌ ژی ژ به‌ر خودێ، نه‌ ژ ترسێن كه‌سه‌كی، نه‌ بۆ به‌رژه‌وه‌ندییێن خۆ، نه‌ بۆ بده‌ستڤه‌ئینانا مفایه‌كی، هنگی جزا و خه‌لاتێ ڤی كه‌سی دێ ئه‌ڤه‌بیت كو پله‌ و قه‌در و بهایێ وی دێ هێشتا بلندتر لێ هێت.