پێغه‌مبه‌ر (صه‌لات و سه‌لامێن خودێ ل سه‌ر بن) هاته‌ ده‌ڤ مه‌، ڤێجا مه‌ گۆت: ئه‌ی پێغه‌مبه‌رێ خودێ؛ مه‌ زانی دێ چاوا سلاڤ كه‌ینه‌ ته‌‌، به‌لێ پا دێ چاوا صه‌له‌واتان ده‌ینه‌ سه‌ر ته‌؟

صه‌حابییان پرسیار ژ پێغه‌مبه‌ری (صه‌لات و سه‌لامێن خودێ ل سه‌ر بن) كر ده‌رباره‌ی شێواز و چاوانییا صه‌له‌واتدانێ ل سه‌ر وی؟ پشتی كو شێوازێ سلاڤكرنێ ل سه‌ر وی د ته‌حیاتێدا (ته‌شه‌هودێدا) زانی: "السلام عليك أيها النبي ورحمة الله وبركاته..."؟ ڤێجا پێغه‌مبه‌ری (صه‌لات و سه‌لامێن خودێ ل سه‌ر بن) شێوازێ صه‌له‌واتدانێ نیشا وان دا، و ڕامانا وێ ژی ئه‌ڤه‌یه‌: " اللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ" ئانكو: مه‌دح و په‌سنا وی ب ئاخڤتنێن جوان د ناڤ مه‌لائیكه‌تێن بلنددا بكه‌، و هه‌روه‌سا ل سه‌ر دویكه‌ڤتییێن ئایینێ وی و باوه‌ردارێن ژ كه‌س و كارێن وی. "كَمَا صَلَّيْتَ عَلَى آلِ إِبْرَاهِيمَ" ڤێجا هه‌روه‌كی كا چاوا ته‌ قه‌نجی د گه‌ل مالباتا ئیبراهیمی (سلاڤ لێ بن) كرییه كو ئه‌و ژی ئیبراهیم و ئیسماعیل و ئیسحاق و دوینده‌ھ و دویكه‌ڤتییێن وان یێن باوه‌ردارن، ئاها وه‌سا تو قه‌نجییا خۆ بگه‌هینه‌ موحه‌ممه‌دی ژی (صه‌لات و سه‌لامێن خودێ ل سه‌ر بن).‌ " إِنَّكَ حَمِيدٌ مَجِيدٌ". تو یێ په‌سنكریی د زات و سالۆخه‌ت و كریارێن خۆدا و تو گه‌له‌كێ مه‌زن و خودان ده‌ستهه‌لاتی و دان و به‌خشینا ته‌ ژی یا مه‌زنه‌. "اللَّهُمَّ بَارِكْ عَلَى مُحَمَّدٍ وَعَلَى آلِ مُحَمَّدٍ، كَمَا بَارَكْتَ عَلَى آلِ إِبْرَاهِيمَ". ژ خێر و كه‌ره‌م و قه‌نجییا خۆ؛ مه‌زنترین پشك بده‌ وی و بۆ وی زێده‌ بكه‌ و بۆ بنه‌جھ و به‌رده‌وام بكه‌.