((هه‌ر كه‌سێ نه‌خۆشی و ته‌نگاڤییه‌كێ ژ نه‌خۆشی و ته‌نگاڤییێن دونیایێ ل سه‌ر باوه‌رداره‌كی ڕاكه‌ت؛ خودێ دێ نه‌خۆشی و ته‌نگاڤییه‌كا ڕۆژا قیامه‌تێ ل سه‌ر وی ڕاكه‌ت

ئبن ده‌قیق ئه‌لعید دبێژیت: ئه‌ڤه‌ فه‌رمووده‌یه‌كا مه‌زنه‌، فه‌رمووده‌یه‌كا كۆمكه‌ره‌ بۆ چه‌ندین جۆرێن زانینێ و بناخه‌ و ئادابان، تێدا به‌حسێ هاریكاریكرنا موسلمانان و ئه‌نجامدانا كارێن وان و مفاگه‌هاندنا ب وان ل دویڤ وی تشتێ بۆ مرۆڤی ب ساناهی كرییە‌ ژ زانینێ یان مالی یان هاریكارییێ یان ئاماژه‌دانێ ب به‌رژه‌وه‌ندییه‌كێ یان شیره‌تكرنه‌كێ یان هه‌ر تشته‌كێ دی بیت.
هاندانا مرۆڤی ل سه‌ر ب ساناهیكرنا كاروبار و بارێ مرۆڤێ ته‌نگاڤ و به‌رته‌نگ.
هاندان ل سه‌ر هندێ مرۆڤ هاریكارییا مرۆڤێ موسلمان بكه‌ت و كو خودایێ مه‌زن به‌رده‌وام دێ هاریكارییا مرۆڤی كه‌ت هندی مرۆڤ ژی هاریكارییا برایێ خۆ بكه‌ت.
ژ ستاره‌كرنا موسلمانی ئه‌ڤه‌یه‌: مرۆڤ ل دویڤ عه‌یب و كێماسییێن وی نه‌چیت، ژ هنده‌ك سه‌له‌فان هاتییه‌ ڤه‌گوهاستن كو گۆتییه‌: ئه‌ز گه‌هشتمه‌ هنده‌ك مرۆڤان كو چ عه‌یب و كێماسی ل ده‌ڤ نه‌بوون، ئه‌و ژی چوون به‌حسێ عه‌یب و كێماسییێن خه‌لكی كرن، له‌وا خه‌لكی ژی به‌حسێ عه‌یب و كێماسییێن وان كر، و ئه‌ز گه‌هشتمه‌ هنده‌ك مرۆڤان كو عه‌یب و كێماسی ل ده‌ڤ هه‌بوون، به‌لێ وان ئه‌زمانێ خۆ ژ به‌حسكرنا عه‌یب و كێماسییێن خه‌لكی گرت؛ ژ به‌ر هندێ عه‌یب و كێماسییێن وان ژى هاتنه ژبیركرن.
هێلانا خرابییێ وه‌كی خۆ و نه‌گوهۆڕینا وێ و مایتێنه‌كرنا وێ نه‌ ژ وان تشتانه‌ یێن ل سه‌ر مرۆڤی فه‌ر دبن ئه‌گه‌ر مرۆڤی موسلمان ستاره‌ كر و عه‌یب و كێماسییێن وان ڤه‌شارتن، به‌لكی خرابی دێ هێته‌ گوهاڕتن و خودان دێ هێته‌ ستاره‌كرن، ئه‌ڤه‌ ده‌رحه‌قێ وی كه‌سێ ب خرابی و چوونا د ناڤ وێدا و زێده‌گاڤی نه‌كرنا د وێدا نه‌هاتبیته‌ نیاسین، به‌لێ سه‌باره‌ت وی كه‌سێ ب ڤێ چه‌ندێ هاتبیته‌ نیاسین و خه‌لك وه‌سا بنیاسیت؛ هنگی سوننه‌ت نینه‌ مرۆڤ وی ستاره‌ بكه‌ت، به‌لكی دێ كارێ وی بۆ خودانێ ده‌ستهه‌لاتێ بلند كه‌ت، ئه‌گه‌ر ترسا په‌یدابوونا چ خرابییان ژ ڤی كاری نه‌هێته‌ كرن، ئه‌ڤه‌ ژی چونكی ستاره‌كرن ل ڤی مرۆڤێ خراب؛ دێ وی پتر د سه‌ر پێیاندا به‌ت و دێ وێره‌كییێ ل ده‌ڤ وی په‌یدا كه‌ت كو زێده‌تر نه‌خۆشییێ بۆ خه‌لكی دروست بكه‌ت و دێ وێره‌كییێ ل ده‌ڤ وان كه‌سێن دی ژی ژ خودانێن خرابی و ڕكدارییێ په‌یدا كه‌ت.
هاندان ل سه‌ر داخوازكرنا زانینێ و خواندنا قورئانێ و فێركرنا وێ.
نه‌وه‌وی دبێژیت: به‌لگه‌یه‌ك د ڤێ فه‌رمووده‌یێدا هه‌یه‌ ل سه‌ر كۆمبوونا ل مزگه‌فتێ بۆ خواندنا قورئانێ .. و قوتابخانه‌ و چه‌په‌رێن شه‌ڕی و جهێن وه‌كی وان ژی ب ئانه‌هییا خودێ دچنه‌ د بن حوكمێ مزگه‌فتێڤه‌ بۆ بده‌ستڤه‌ئینانا ڤێ خێرا مه‌زن.
خودێ جزادان و خه‌لاتكرن یێ دانایه‌ سه‌ر كاروكریاران، نه‌كو سه‌ر نه‌سه‌بێ.