“ក្នុងចំណោមប្រការដែលបញ្ជាក់ថា ភាពជាអ៊ីស្លាមរបស់បុគ្គលម្នាក់បានល្អប្រសើរនោះ គឺគេបោះបង់ចោលនូវអ្វីដែលគ្មានប្រយោជន៍”។

មនុស្សម្នាក់ៗមានលក្ខណៈផ្សេងៗគ្នាចំពោះឥស្លាមរបស់ខ្លួន ហើយពិតណាស់ រូបគេអាចបន្ថែមនូវភាពល្អប្រសើររបស់ខ្លួនតាមរយៈទង្វើមួយចំនួន។
ការបោះបង់អ្វីដែលមិនសំខាន់ និងគ្មានប្រយោជន៍ មិនថាពាក្យសម្តី ឬទង្វើ គឺជាភស្តុតាងបញ្ជាក់ពីភាពពេញលេញនៃឥស្លាមរបស់បុគ្គលម្នាក់ៗ។
ជំរុញឲ្យធ្វើខ្លួនឲ្យរវល់នឹងកិច្ចការដែលមានប្រយោជន៍ដល់ខ្លួនទាក់ទងនឹងកិច្ចការសាសនា និងលោកិយ ព្រោះក្នុងចំណោមប្រការដែលបញ្ជាក់ថា អ៊ីស្លាមរបស់បុគ្គលម្នាក់បានល្អប្រសើរនោះ គឺការបោះបង់ចោលនូវអ្វីដែលគ្មានប្រយោជន៍ដល់ខ្លួន។ ដូចនេះ ក្នុងចំណោមប្រការដែលបញ្ជាក់ថា អ៊ីស្លាមរបស់បុគ្គលម្នាក់បានល្អប្រសើរដែរនោះ គឺការធ្វើខ្លួនឲ្យរវល់នឹងដែលកិច្ចការដែលមានប្រយោជន៍។
អ៊ិពនុលក័យយិម រ៉ហ៊ីម៉ាហ៊ុលឡោះ បាននិយាយថា៖ ណាពី ﷺ លោកបានសរុបអត្ថន័យនៃពាក្យថា វ៉ារ៉ក នៅក្នុងឃ្លាតែមួយ ដោយលោកមានប្រសាសន៍ថា៖ “ក្នុងចំណោមប្រការដែលបញ្ជាក់ថា ភាពជាអ៊ីស្លាមរបស់បុគ្គលម្នាក់បានល្អប្រសើរនោះ គឺគេបោះបង់ចោលនូវអ្វីដែលគ្មានប្រយោជន៍”។ ដូចនេះ វាគឺទូទៅចំពោះការបោះបង់ប្រការដែលគ្មានប្រយោជន៍ទាំងអស់ មិនថាការនិយាយស្តី ការមើល ការស្តាប់ ការវាយ ការដើរ ការគិត ក៏ដូចជាគ្រប់ចលនាទាំងអស់ ទាំងខាងក្រៅ ទាំងខាងក្នុង។ នេះ ជាឃ្លាដែលមានអត្ថន័យទូលំទូលាយមួយនៃពាក្យថា វ៉ារ៉ក។
អ៊ិពនូរ៉ហ្ជប់ បាននិយាយថា៖ ហាទីស្ហនេះ ជាមូលដ្ឋានគ្រឹះមួយក្នុងចំណោមមូលដ្ឋានគ្រឹះនៃសុជីវធម៌។
ជំរុញឲ្យស្វែងរកចំណេះដឹង ព្រោះតាមរយៈចំណេះដឹងធ្វើឲ្យមនុស្សអាចដឹងថា ប្រការណាជាប្រការដែលមានប្រយោជន៍ ប្រការណាជាប្រការដែលគ្មានប្រយោជន៍។
ការប្រើគ្នាឲ្យធ្វើអំពើល្អ ហាមឃាត់គ្នាពីអំពើអាក្រក់ និងការផ្តល់ដំបូន្មាន ក៏ជាប្រការដែលមានប្រយោជន៍ដល់មនុស្សផងដែរ ព្រោះវាជាប្រការដែលគេបង្គាប់ប្រើ។
ចូលក្នុងអត្ថន័យទូទៅនៃហាទីស្ហនេះផងដែរ គឺការចៀសឆ្ងាយពីប្រការដែលគ្មានប្រយោជន៍ក្នុងចំណោមប្រការដែលអល់ឡោះជាម្ចាស់ទ្រង់បានដាក់បម្រាម ហើយនិងអ្វីដែលណាពី ﷺ លោកមិនពេញចិត្ត។ ក៏ដូចគ្នាដែរ អ្វីដែលមនុស្សមិនមានតម្រូវការចំពោះវាទាក់ទងនឹងកិច្ចការបរលោក ដូចជាធាតុពិតនៃប្រការអាថ៌កំបាំងផ្សេងៗ បុព្វហេតុលម្អិតទាក់ទងនឹងការបង្កើត និងបទបញ្ជារបស់អល់ឡោះ រួមទាំងការសួរដេញដោល និងស្វែងរកនូវរឿងរ៉ាវ ឬប្រការដែលមិនអាចកើតឡើង ឬស្ទើរតែមិនអាចកើតឡើង ឬមិនអាចស្រមៃថា វានឹងកើតឡើង។