កាលណាចូលដល់ដប់យប់(ចុងក្រោយនៃខែរ៉ម៉ាហ្ទន) រ៉ស៊ូលុលឡោះ ﷺ លោកនៅទល់ភ្លឺ ហើយលោកដាស់គ្រួសាររបស់លោក ព្រមទាំងខិតខំប្រឹងប្រែង(ក្នុងការគោរពសក្ការៈ) និងរឹតបន្តឹងចង្កេះខោ។

លើកទឹកចិត្តឱ្យឆ្លៀតឱកាសទាញយកប្រយោជន៍ពីពេលវេលាដែលមានភាពល្អប្រសើរដោយការសាងទង្វើកុសល។
អ៊ីម៉ាំ អាន់ណាវ៉ាវី បាននិយាយថា៖ ហាទីស្ហនេះបង្ហាញថា ស៊ូណិតបង្កើននូវការគោរពសក្ការៈក្នុងដប់ថ្ងៃចុងក្រោយនៃខែរ៉ម៉ាហ្ទន ហើយស៊ូណិតបំពេញពេលយប់របស់វាដោយការគោរពសក្ការៈ។
គប្បីលើខ្ញុំបម្រើរបស់អល់ឡោះត្រូវយកចិត្តទុកដាក់ចំពោះក្រុមគ្រួសាររបស់ខ្លួនដោយបង្គាប់ពួកគេឱ្យគោរពសក្ការៈ និងអត់ធ្មត់ជាមួយពួកគេ។
ការធ្វើអំពើល្អត្រូវការភាពម៉ឺងម៉ាត់ អត់ធ្មត់ និងការស៊ូទ្រាំ។
អ៊ីម៉ាំ អាន់ណាវ៉ាវី បាននិយាយថា៖ សាសនវិទូឥស្លាមមានការខ្វែងយោបល់គ្នាចំពោះអត្ថន័យនៃពាក្យ៖ “រឹតបន្តឹងចង្កេះខោ”។ អ្នកខ្លះយល់ថា ជាការខិតខំប្រឹងប្រែងនៅក្នុងការគោរពសក្ការៈច្រើនជាងពេលធម្មតារបស់ណាពី ﷺ ។ ដែលនេះមានន័យថា ឧស្សាហ៍ព្យាយាមក្នុងការគោរពសក្ការៈ។ ឧទាហរណ៍គេនិយាយថា៖ ខ្ញុំរឹតបន្តឹងចង្កេះខោរបស់ខ្ញុំសម្រាប់កិច្ចការនេះ មានន័យថា ខ្ញុំឧស្សាហ៍ព្យាយាម និងផ្តោតលើវា។ អ្នកខ្លះទៀតយល់ថា៖ ជាន័យធៀបសម្រាប់ការដែលឃ្លាតឆ្ងាយពីភរិយាដើម្បីផ្តោតលើការគោរពសក្ការៈ។