Qor'ani ntagatifu, ni amajambo y'Imana Allah, Umubungabunzi Rurema
w'ibiremwa vyose, Yayimanuriye uwahetuye Abavugishwamana n'Intumwa,
Muhamadi (nyakugira amahoro n'impuhwe z'Imana Allah). Iyo Qor'ani yamanuwe
kugira imenyeshe ibiremwa ihangiro ry'iremwa ryavyo, ibirongore ku bikorwa
birimwo imvo z'uguhimbarwa kwavyo mu buzima bwo kw'isi no mu bw'inyuma yo
gupfa, iheze ibirokore mu magorwa yamaho mu nyuma yo gupfa. Qor'ani ntagatifu
rero, ni co Gitabu camanuwe mu nyuma mu Bitabu vyamanuwe n'Imana Allah, kugira
ishimangire ukuri kuri muri vyo, yongere isubirize amabwirizwa yavyo mu gushinga
ayandi.
Qor'ani ntagatifu, ni icemezo n'igitangaro bizokwamaho, vyemeza ubutumwa
bw'Intumwa y'Imana Muhamadi (nyakugira amahoro n'impuhwe z'Imana Allah),
Imana Allah Yahigishije abantu n'Amajini ko vyozana amajambo ameze nkayo,
n'aho coba ari igisomwa kimwe gusa, biraheza birananirwa.
Iminwe y'abahindagura amajambo, ntirashika aho yohindura na kimwe muri yo
kuva aho imanuriwe. Haraheze rero ikiringo kirenga ibinjana 14 imanuwe, kira noneho
izoguma ibungwabunzwe icungerewe n'ururimi rw'icarabu yamanuwemwo, aho
Imana Allah ari Yo Yonyene Yishinze kuyicungera ngo ntivogerwe n'abayihindagura
gushika ku musi w'iherezo.
Qor'ani ntagatifu, ni ryo tegeko rya mbere ry'ubwislamu, ikaba n'ibwirizwa
ngenderwako ryisungwa mu gutunganya ubuzima bwa kiremwa-muntu mu bihe
vyose n'aho ari ho hose; irarikira abantu ukwiyeregereza Imana Allah mu kuyisenga
Itabangikanijwe na kimwe, kuko ari Yo Yonyene Rurema; igatomorera kiremwa-muntu
ico cose akeneye kumenya ku vyerekeye Imana Rurema Allah, hamwe n'idini ry'ukuri
ico kiremwa gitegerezwa gukurikira, kinamenye n'intango y'iremwa ry'isi n'ijuru n'ibiri
muri vyo, hatibagiwe iremwa ry'umuntu. Iranavuga ku vyerekeye ibinyegejwe ibiremwa,
muri kahise no muri kazoza, ku vyererekeye kahise n'amateka y'Abavugishwamana (ba
nyakugira amahoro y'Imana Allah), ukuntu Imana Allah Yabateye ingoga bakanesha
abansi babo bagahona. Muri Qor'ani harimwo kandi amategeko ngenderwako ku bijanye
no gutunganya amasengesho n'umubano mwiza mu bantu, mu bijanye n'amasezerano
abantu bagiriranira hagati yabo mu gutunganya ivyerekeye ubuzima bwa misiyose.
Bitayeko, harimwo n'amategeko ngenderwako ku bijanye no gutsimbataza inyifato
QOR'ANI NTAGATIFU, NI IGIKI
n'ingeso nziza hamwe no kwihanikiriza inyifato n'ingeso mbi mu bantu. Qor'ani kandi
iratomora neza na neza ko mu buzima bw'inyuma yo gupfa, iherezo.
ry'ibiremwa rizoba ari mu Bwami bw'ijuru bwagenewe abemeramana, canke
rikaba ari mu muriro udahera wagenewe abagenzwa n'akarenganyo kw'isi be
n'abagarariji.
Mu kwerekana rero akamaro gahambaye k'iki Gitabu Imana Allah Yamanuye
mu rurimi rw'icarabu, Igategeka ko gishikirizwa ibiremwa vyose, turahimbawe no
kugushikiriza ewe musomyi w'ikirundi, insiguro ya Qor'ani ntagatifu mu rurimi
rwawe, kugira woroherwe n'ukugitahura, maze ushobore na we kugishikiriza
abandi. Ni ukuri, umugwi wagiteguye, waritaye ku rutare kugira utahure insobanuro
ya Qor'ani, uheze uyisigure mu kirundi, n'aho bizwi ko urugero rwose umuntu
yogezako mu gusigura neza, rudashobora guhetura insiguro zimbitse ziri muri
Qor'ani yamanuwe ari igitangaza mu kuntu yubatse, mu buryo burengeye kure n'iyo
ubushobozi bwa kiremwa-muntu. Uwoshaka rero kumenya ibirenzeko mu nsiguro
zimbitse gusumba ziri muri Qor'ani ntagatifu, twomuhanura ko yokwiga nantaryo
icarabu yamanuwemwo, co soko ry'ubumenyi bwayo.
Uwipfuza gusoma iyi nsiguro ya Qor'ani, arashobora guca ku buryo bwa (QR)
kugira ashobore kuyisoma mu rurimi rwiwe rw'ikirundi.
Turahimbawe rero n'ukwakira intererano y'ivyiyumviro vyanyu mu ntumbero yo
kuryohora insiguro ya Qor'ani, mubicishije ahagenewe intererano y'ivyiyumviro,
imbere ya Aayah, ku rubuga ngurukanabumenyi rwagenewe Qor'ani ntagatifu