Iyo toban habeen,
Habeennada Dul-xija
Maxaan ku soo dhawaynaynaa maalmahan (Tobabka Dul-xija)?
Ibnu Cabbaas waxaa laga weriyay inuu yiri, rasuulka ﷺ ayaa yiri: “Maalmo ma jiraan, camalka wanaagsan Alle looga jacayl badan yahay, maalmahan” (wuxuu u jeedaa tobanka maalmood). Waxay dhaheen, rasuulkii Allow! Jihaadkana ku daroo, ma iyagaa looga jacayl badan yahay? Markaasuu yiri: “Jihaadkana ku dar; kolka laga reebo nin naftiisa iyo maalkiisaba jihaad u saaray, kaddibna aan waxba kala soo laaban”.
Camalka wanaagsanina waxa uu koobsanayaa noocyada cibaadada ee kala duwan, sida: soonka, salaadda, xajka, xuska Alle, Alle-u-takbiirsiga, Quraan-akhriska, in wax lagu bixiyo meelaha wanaagsan iyo wixii la mid ah.
Waxyaabaha sida gaarka ah loo adkeeyay maalmahan waxaa ka mid ah:
- Soonka, marka laga reebo maalimka tobanaad. Waxaa laga weriyay qaar ka mid ah xaasaskii rasuulka ﷺ inay tiri: “Rasuulku ﷺ waxa uu ahaa mid sooma sagaalka maalmood ee Dul-xija”. Gaar ahaan maalinka Carafo oo soonkiisa lagu dhaafo labo sano denbigood.
- Xajka, waana waxa ugu fadliga badan ee la qabto tobanka maalmood. Rasuulkuna ﷺ waxa uu yiri: “Xajka suubban, maaha abaalkiisu janno mooyee”.
- Ulxada, waana sunne la adkeeyay. Qofkii doona inuu ulxaysto waxa uu ka fogaanayaa in uu timihiisa iyo ciddiyihiisa wax ka gooyo laga bilaabo soo gelitaanka bisha Dul-xija, ilaa uu ka gawracayo ulxadiisa.
- In la badiyo tahliisha, takbiirta iyo Alle-mahdinta, habka loo takbiirsanayona waa: “Allaahu Akbar, Allaahu Akbar, Allaahu Akbar. Laa ilaaha illa-laahu, Allaahu Akbar, Allaahu Akbar, Walillaahil-xamdu”.
- Dhammaad -
