Nabiyyiin - Rabbiin rahmataa fi nageenya isaan irratti haa buusu- kophee isaanii uffachuu, rifeensa isaanii filachuu, of qulqulleeffachuu fi dhimmoota isaanii hunda keessatti mirga dursuu jaallatu turani

Nawawiin akkas jedhe: kun shari'aa keessatti foormulaa(qajeelfama) itti fufaa ta'edha, wanti kabajaa fi sadarkaan wol qabate hundi akka mudawwara, kofoo fi kophee uffachuu, masjiida seenuu, suwaakkachuu, kuullachuu, qeensa qorachuu, areeda funyaan jalaa gabaabsuu, rifeensa faaqqifachuu, rifeensa bobaa buqqisuu, rifeensa mataa aaddachuu, salaata irraa salaama baafachuu, qaamolee xahaaraa dhiqachuu, mana fincaaniitii ba'uu, nyaataa fi dhugaatii, harka wol fuuchuu, hajar al-aswadiin dhungachuu fi kanneen birooo kana fakkatan mirga dursuun jaallataamaadha, wontoonni faallaa kanaatiin ta'an immoo akka mana fincaanii seenuu, masjidaa ba'uu, furrii baafachuu, istinjaa godhachuu, mudawwara, kofoo fi kophee baafachuu fi kanneen kana fakkaatan, bitaa dursuun jaallatamaadha, kun hunduu kabajaa mirgaatii fi sadarkaa isaatiifi.
"Mirga dursuutu isaan jaallachiisa", jechuun: hojii keessatti harka mirgaatiin, miila mirgaatiin, cinaa mirgaatiin eegaluu fi mirgaan fudhachuu fi kennuu jechuudha.
Nawawiin akkas jedhe: beeki! qaamowwan wuduu'aa keessaa kan mirga dursuun jaallatamaa hin taanetu jira; innis gurra lameen, harka lameenii fi maddii lameeni, yeruma tokkotti woliin qulqulleefata, kun nama qaamni muramaa fi kan isa fakkaatanuuf kan rakkisu yoo ta'e immoo; mirga dursa.