မည်သူမဆို မိမိ၏(မုသားလိမ်လည်)ကျိန်ဆိုမှုဖြင့် မွတ်စ်လင်မ်တစ်ဦး၏ အခွင့်အရေးကို ဖြတ်ယူသိမ်းပိုက်လျှင် အလ္လာဟ်အရှင်မြတ်သည် ဂျဟန္နမ်ငရဲမီးကို ထိုသူအတွက် ထိုက်တန်စေတော်မူပြီး၊ ၎င်းအပေါ်၌ ဂျန္နသ်သုခဘုံကို ဟရာမ်အဖြစ်သတ်မှတ်တော်မူမည်။ ထိုအခါ လူတစ်ဦးက ကိုယ်တော့်အား "အိုအလ္လာဟ်အရှင်မြတ်၏ ရစူလ်တမန်တော်၊ အကယ်၍ ထိုအရာသည် မပြောပလောက်သောအရာဖြစ်လျှင်ပင်လော"ဟု လျှောက်ထားမေးမြန်းရာ တမန်တော်မြတ်(ဆွလ္လလ္လာဟုအလိုင်ဟိဝစလ္လမ်) က "သွားတိုက်တံပြုလုပ်ရာတွင် အသုံးပြုသော ကိုင်းလေးတစ်ချောင်းမျှသာဖြစ်စေကာမူ ဤပြစ်ဒဏ်ပင် ဖြစ်သည်"ဟု မိန့်ကြားတော်မူခဲ့သည်။

၁။ အခြားသူများ၏အခွင့်အရေးများကို သိမ်းပိုက်ရယူခြင်းမှ သတိထားဆင်ခြင်ရန်နှင့် မည်မျှပင်သေးငယ်စေကာမူ ၎င်းတို့၏အခွင့်အရေးများကို ပြန်လည်ပေးအပ်ရန် အထူးဂရုပြုရမည်။ တရားသူကြီး၏ မှားယွင်းသောဆုံးဖြတ်ချက်သည် လူသားတစ်ဦးအတွက် မိမိပိုင်ဆိုင်ခြင်းမရှိသောအရာကို ခွင့်ပြုလိုက်ခြင်းမျိုး မဖြစ်စေနိုင်ကြောင်းကိုလည်း ရှင်းလင်းဖော်ပြထားသည်။
၂။ အိမာမ်နဝဝီက ဆိုသည်မှာ- မွတ်စ်လင်မ်များ၏ အခွင့်အရေးကို မတရားသိမ်းယူခြင်းသည် အလွန်ပြင်းထန်သော ဟရာမ်တားမြစ်ချက်ဖြစ်ပြီး ဤကိစ္စတွင် အခွင့်အရေး၏ တန်ဖိုးနည်းခြင်း၊ များခြင်းဟူ၍ မခွဲခြားဘဲ တူညီသောပြစ်ဒဏ်ရှိသည်။အကြောင်းမှာ "သွားတိုက်တံပြုလုပ်ရာတွင် အသုံးပြုသော ကိုင်းလေးတစ်ချောင်းမျှသာဖြစ်စေကာမူ ဤပြစ်ဒဏ်ပင် ဖြစ်သည်"ဟု တမန်တော်မြတ်(ဆွလ္လလ္လာဟုအလိုင်ဟိဝစလ္လမ်)၏ မိန့်ကြားချက် ရှိသောကြောင့် ဖြစ်သည်။
၃။ အိမာမ်နဝဝီက ဆိုသည်မှာ- ဤပြစ်ဒဏ်သည် မွတ်စ်လင်မ်တစ်ဦး၏အခွင့်အရေးကို ဖြတ်ယူသိမ်းပိုက်ပြီး၊ သောင်ဗဟ်မလုပ်ဘဲ (ဤအပြစ်ဖြင့်) ကွယ်လွန်သေဆုံးသွားသူများအတွက်ဖြစ်သည်။ သို့သော် အကြင်သူသည် သောင်ဗဟ်ပြုလုပ်ပြီး၊ မိမိပြုလုပ်ခဲ့သောအပြစ်အတွက် နောင်တရကာ အခွင့်အရေးရှိသူအား ၎င်း၏အခွင့်အရေးကို ပြန်လည်ပေးအပ်ခြင်း၊ ခွင့်လွှတ်မှုတောင်းခံခြင်းနှင့် ယင်းအပြစ်ကို နောင်တွင်ထပ်မံမပြုလုပ်ရန် ခိုင်မာသောဆုံးဖြတ်ချက်ချမှတ်ခြင်းတို့ ပြုလုပ်ခဲ့လျှင် ၎င်း၏အပြစ်သည် ကင်းစင်သွားမည်ဖြစ်သည်။
၄။ ကာဿွီ‌အေယာဿ်ွက ဆိုသည်မှာ - ဤနေရာတွင် မွတ်စ်လင်မ်များကို အထူးဖော်ပြခြင်းမှာ ၎င်းတို့သည် ရှရီအသ်တရားတော်၏ ဦးတည်မိန့်ကြားခံရသူများဖြစ်ပြီး၊ လက်တွေ့ကျင့်သုံးသူအများစုဖြစ်သောကြောင့်ဖြစ်သည်။ ဤသည် မွတ်စ်လင်မ်မဟုတ်သူ၏အခွင့်အရေးကို သိမ်းယူခွင့်ရှိသည်ဟု ဆိုလိုခြင်းမဟုတ်ပါ။ မွတ်စ်လင်မ်များကဲ့သို့ပင် မွတ်စ်လင်မ်မဟုတ်သူများ၏အခွင့်အရေးကိုလည်း မတရားသိမ်းယူခွင့်မရှိပေ။
၅။ အိမာမ်နဝဝီက ဆိုသည်- မုသား စကားဆိုသည်မှာ အတိတ်ဖြစ်စေ၊ အနာဂတ်ဖြစ်စေ၊ ရည်ရွယ်ချက်ရှိရှိဖြစ်စေ၊ မရည်ရွယ်ဘဲဖြစ်စေ ဖြစ်ရပ်မှန်နှင့်ဆန့်ကျင် ဘက်ဖြစ်သော သတင်းအချက် အလက်ကို ပြောဆိုခြင်းဖြစ်သည်။