ကျွန်ုပ်တို့သည် တမန်တော်မြတ်(ဆွလ္လလ္လာဟုအလိုင်ဟိဝစလ္လမ်) ကျွန်ုပ်တို့နှင့်အတူရှိစဉ်အခါက ဇကားသုလ်ဖိသွိရ် (ဖိသ်ရဟ်) ကို ကလေးဖြစ်စေ၊ လူကြီးဖြစ်စေ၊ လွတ်လပ်သူဖြစ်စေ၊ ကျွန်ဖြစ်စေ၊ အားလုံးဘက်မှ အစားအစာတစ်စွာအ် သို့မဟုတ် နို့ခဲတစ်စွာအ် သို့မဟုတ် မုယောစပါးတစ်စွာအ် သို့မဟုတ် စွန်ပလွံသီးတစ်စွာအ် သို့မဟုတ် စပျစ်ခြောက်တစ်စွာအ်ကို ပေးလေ့ရှိကြသည်

၁။ တမန်တော်မြတ်(ဆွလ္လလ္လာဟုအလိုင်ဟိဝစလ္လမ်) ၏ ခေတ်ကာလ၌ စွဒကသုလ်ဖိသ်ရ်၏ ပမာဏကို ရှင်းလင်းတင်ပြထားသည်။ ၎င်းမှာ အမျိုးအစားနှင့် တန်ဖိုးကွဲပြားနိုင်သော်လည်း အစားအစာ တစ်စွာအ် ပင် ဖြစ်သည်။
၂။ လူတို့စားသုံးသည့် မည်သည့်အစားအစာမဆို ဖိသ်ရဟ်‌အဖြစ် ပေးခွင့်ပြုထားသည်။ သို့ရာတွင် အထက်ဖော်ပြပါ အမျိုးအစားလေးမျိုးကို သီးသန့်ဖော်ပြထားခြင်းမှာ ယင်းတို့သည် တမန်တော်မြတ်(ဆွလ္လလ္လာဟုအလိုင်ဟိဝစလ္လမ်) ၏ ခေတ်ကာလက လူတို့စားသုံးသည့် အဓိက အစားအစာများ ဖြစ်သောကြောင့် ဖြစ်သည်။
၃။ စားနပ်ရိက္ခာအစား ငွေကြေးပေးခြင်းအားဖြင့် ဖိသ်ရဟ်အထမြောက်မည် မဟုတ်ပေ။
၄။ အိမာမ်နဝဝီက ဆွဟီးဟ်မွတ်စ်လင်မ်ကျမ်း၏ ရှရဟ်( အကျယ်ဖွင့်ဆိုချက်)၌ ဤသို့ရှင်းလင်းမိန့်ကြားသည်မှာ- "ဆွဟာဗဟ်များကြား၌ သဘောထားကွဲလွဲမှုရှိပါက၊ ၎င်းတို့အနက် တစ်ဦးတစ်ယောက်၏ အဆိုပြုချက်သည် အခြားသူတစ်ဦး၏ အဆိုပြုချက်ထက် ပိုမိုဦးစားပေးရန်မဖြစ်နိုင်သည့်အတွက် ကျွန်ုပ်တို့သည် အခြားသော သက်သေအထောက်အထားများဆီသို့ ပြန်လှည့်ရမည်။ ဟဒီးဆ်တော်များ၏ ပေါ်လွင်ထင်ရှားသည့်အဓိပ္ပါယ်နှင့် ကိယားစ် (နှိုင်းယှဉ်ဆင်ခြင်မှု) များသည် အခြားစားနပ်ရိက္ခာများကဲ့သို့ပင် ဂျုံအတွက်လည်း တစ်စွာအ်သတ်မှတ်ရန် လိုအပ်သည်ဟူသောအဆိုနှင့် ကိုက်ညီနေသည်ကို ကျွန်ုပ်တို့တွေ့ရှိရသည်။ ထို့ကြောင့် ဤအဆိုကို ယုံကြည်အားထားရမည်ဖြစ်သည်။
၅။ အစ်ဗ်နေဟဂျရ်က ဆိုသည်မှာ- အဘူစအီးဒ် (ရဿွိယလ္လာဟုအန်ဟု) ၏ ဟဒီးဆ်တွင် သူသည် တမန်တော်မြတ် (ဆွလ္လလ္လာဟုအလိုင်ဟိဝစလ္လမ်) ၏ နောက်သို့ တင်းပြည့်ကျပ်ပြည့် လိုက်နာခြင်း၊ တမန်တော်မြတ်၏ အမိန့်တော်များကို စွဲကိုင်ထားခြင်း၊ နတ်စ်ွ (ကုရ်အာန်၊ စွန္နသ်၏ ) သက်သေအထောက် အထား ရှိပါက အိဂျ်သိဟာဒ် (ဆင်ခြင်တုံတရားဖြင့် ကောက်ချက်ချခြင်း) မှ ရှောင်ကြဉ်ရန် ဆန္ဒပြင်းပြမှုမည်မျှရှိကြောင်း ဖော်ပြနေသည်။ မုအာဝိယဟ် (ရဿွိယလ္လာဟုအန်ဟု) ၏ လုပ်ဆောင်ချက်နှင့် ယင်အား လူတို့၏လက်ခံမှုသည် အိဂျ်သိဟာဒ် (ဆင်ခြင်တုံတရားဖြင့် ကောက်ချက်ချခြင်း)သည် ပြုပိုင်ကြောင်းနှင့် ၎င်းသည် ချီးမွမ်းထိုက်သည့် အရာဖြစ်ကြောင်း ညွှန်ပြနေသည်။ သို့ရာတွင် နတ်စ်ွ(ကုရ်အာန်၊ စွန္နသ်၏ ) ရှင်းလင်းပြတ်သားသော သက်သေအထောက်အထားရှိပါက၊ ယင်း (အိဂျ်သိဟာဒ်) သည် လက်ခံခြင်းခံရမည် မဟုတ်ပေ။