Yaa Mam yembse, ad Mam gɩdga wẽgd Mam zugu, n maan-a t'a yaa haraam yãmb ne taab sʋka, bɩ y ra wẽg taab ye

Nabiyaamã (Wẽnd pʋʋsg la A tɩlgr be a yĩnga) vẽnegdame, tɩ Wẽnde, A Naam yɩlgame n zẽke, A yeelame tɩ Yẽnda gɩdga vẽgb ne A Menga, la A maan tɩ vẽgdã yaa sẽn gɩdge, bõn-naandsã ne taab sʋka, bɩ ned ra wẽg a to ye, la bõn-naandsã gilli yaa sẽn meneme n bas sɩdã sore, sã n ka sẽn tũ ne Wẽnd kãndagr la A segl sõngo, rẽnd ned ning sẽn kosa Wẽnd ne kãndagrã, Wẽnd maand-a-la segl sõngo la A kãnd-a, la a leb n wilg tɩ bõn-naandsã yaa talse n tʋg Wẽnd nengẽ, n tar tʋlsem ne-A b yεlã fãa pʋgẽ, la ned ning sẽn kosa Wẽnde, Wẽnd lokda a soabã tʋlsem la A sek-a, la ad nebã, b tudgda wĩndg la yʋngo, la ad Wẽnde, Yẽnd n loet b bãngo la A gãndagd n basd-ba tɩ yambã sã n kos yaafa, La ad b ka tõe n nams Wẽnde, maa b naf-A baa fʋɩ ye, la ad b fãa gillã sã n zoeta Wẽnde, wala ned ning sẽn be bãmb sʋka n yɩɩd Wẽnd zoεεgã buudu, b Wẽnd zoεεgã ka na n paas Wẽnd Naamã baa fʋɩ, la b sã n tʋg n yɩɩme n kɩɩs Wẽnde, tɩ yaa wala bãmb sʋka Wẽnd kɩɩs sẽn tʋg n yɩɩda, b wẽnga ka na n boog Wẽnd Naamã baa fʋɩ ye; bala b yaa valemse, n tar tʋlsem ne Wẽnde, halhaal la zĩig la zamaan ning fãa, la Wẽnd la sek-m-meng Soaba, A Naam yɩlgame, la bãmb sã n yik n yals zĩig a yembre, b ninsaalb la b zĩn-rãmba, la b rẽenem rãmb la b yaoolem rãmba, n kot Wẽnde, t'A kõ ned fãa a sẽn kosã, yẽ ka na n boog bũmb ning sẽn be Wẽnd nengẽ wã baa fʋɩ, sã n ka wala sũpĩim tɩ b sã n kẽes-a mogrẽ n yiis-a, rẽnd mogrã ka boog baa fʋɩ ne sũpĩimã sẽn yiis bũmb ningã ye, la woto yaa sẽn wilgd Wẽnd sek-m-mengã, A Naam yɩlgame.

La ad Wẽnd, A Naam yɩlgame, A gũusda yembsã tʋʋmã, n tigim-ba, rẽ poorẽ t'A wa tʋg n rol-ba b tʋʋma dũni yikr raarã, rẽnd ned ning sẽn wa n mika t'a tʋʋm rolb yaa sõma bɩ a pẽg Wẽnde ne A sẽn maan-a segl sõng t'a tũ-A wã, la ned ning sẽn wa n paama zẽnga, bɩ a ra sãbs sã n ka a meng bala, yõor ning sẽn peeg yẽnda n kẽng bõnẽ wã.