سەیری ئەوانەى خوارەوەى خۆتان بکەن، وسەیری ئەوانەى سەرەوەی خۆتان مەکەن، چونکە ئەمە وا دەکات کە نیعمەتەکانی خواى گەورە بەسەرتانەوە بە کەم نەزانن

ڕەزایبوون -قەناعەت- لە مەزنترین ڕەوشتەكانی ئیماندارە، ونیشانەی ڕازیبوونە بە قەدەری الله.
ئیبن جەریر دەڵێت: ئەم فەرموودەیە جۆرە جیاوازەكانی خێری لەخۆگرتووە؛ چونكە مرۆڤ ئەگەر سەیری ئەوانە بكات كە لە دونیادا زیاتریان پێبەخشراوە ئەوا نەفسی داوای هەمان شت دەكات، وئەو نیعمەتەی الله -سبحانه وتعالی- پێی بەخشیووە بە كەمی دەزانێت، وبە پەرۆش دەبێت لەسەر زیاد كردنی بۆئەوەی بگات بە بەرامبەر یان نزیكی بێتەوە، ئەمیش هەیە لە نێو زۆرێك لە خەڵكی، بەڵام ئەگەر لە شتی دونیایی سەیری خوارەوەی خۆی بكات ئەوا درك بە نیعمەتی الله -سبحانه وتعالی- دەكات لەسەری، بۆیە سوپاسگوزار وسادە دەبێت، ولە خێر وچاكەدا بەكاریدەهێنێت.