ಮುಸ್ಲಿಮನ ಕೆಳಭಾಗದ ಉಡುಪು (ಲುಂಗಿ, ಪ್ಯಾಂಟು) ಕಣಕಾಲಿನ ಅರ್ಧದವರೆಗೆ ಇರಬೇಕು. ಅದು (ಕಣಕಾಲಿನ) ಮಧ್ಯದಿಂದ ಹರಡುಗಂಟುಗಳವರೆಗೆ ಇದ್ದರೆ ಯಾವುದೇ ತೊಂದರೆಯಿಲ್ಲ - ಅಥವಾ ಯಾವುದೇ ದೋಷವಿಲ್ಲ. ಆದರೆ ಹರಡುಗಂಟುಗಳಿಗಿಂತ ಕೆಳಗಿರುವ ಭಾಗವು ನರಕದಲ್ಲಿರುತ್ತದೆ. ಯಾರು ತಮ್ಮ ಕೆಳಭಾಗದ ಉಡುಪನ್ನು ಅಹಂಕಾರದಿಂದ ಎಳೆದೊಯ್ಯುತ್ತಾರೋ ಅವರನ್ನು ಅಲ್ಲಾಹು ಕಣ್ಣೆತ್ತಿ ನೋಡಲಾರನು

ಪ್ರವಾದಿಯವರು (ಅವರ ಮೇಲೆ ಅಲ್ಲಾಹುವಿನ ಕೃಪೆ ಮತ್ತು ಶಾಂತಿಯಿರಲಿ) ಮುಸ್ಲಿಂ ಪುರುಷರ ಕೆಳಭಾಗದ ಉಡುಪಿಗೆ, (ಪುರುಷರ ಕೆಳಭಾಗವನ್ನು ಮುಚ್ಚುವ ಎಲ್ಲವೂ ಇದರಲ್ಲಿ ಒಳಪಡುತ್ತದೆ) ಮೂರು ಸ್ಥಿತಿಗಳನ್ನು ವಿವರಿಸಿದ್ದಾರೆ: ಮೊದಲನೆಯದು: ಅಪೇಕ್ಷಣೀಯ ಸ್ಥಿತಿ. ಅದು ಕಣಕಾಲಿನ ಅರ್ಧದವರೆಗೆ ಇರುವುದು. ಎರಡನೆಯದು: ಯಾವುದೇ ಅಸಹ್ಯತೆ (ಕರಾಹತ್) ಇಲ್ಲದೆ ಅನುಮತಿಸಲಾದ ಸ್ಥಿತಿ. ಅದು ಕಣಕಾಲುಗಳ ಮಧ್ಯದಿಂದ ಹರಡುಗಂಟುಗಳವೆರೆಗೆ ಇರುವುದು. ಹರಡುಗಂಟುಗಳು ಎಂದರೆ ಕಣಕಾಲು ಮತ್ತು ಪಾದವನ್ನು ಜೋಡಿಸುವ ಎರಡು ಉಬ್ಬಿದ ಮೂಳೆಗಳು. ಮೂರನೆಯದು: ನಿಷಿದ್ಧವಾದ ಸ್ಥಿತಿ. ಅದು ಹರಡುಗಂಟುಗಳಿಗಿಂತ ಕೆಳಗಿರುವುದು. ಇವರು ನರಕಾಗ್ನಿಗೆ ಆಹುತಿಯಾಗಬಹುದಾದ ಭಯವಿದೆ. ಅದು ಅಹಂಕಾರ, ಜಂಭ ಮತ್ತು ಅತಿರೇಕದ ಕಾರಣದಿಂದಾಗಿದ್ದರೆ, ಅಲ್ಲಾಹು ಅವರನ್ನು ಕಣ್ಣೆತ್ತಿಯೂ ನೋಡಲಾರ.