ಅಲ್ಲಾಹನ ಸಂದೇಶವಾಹಕರ (ಅವರ ಮೇಲೆ ಅಲ್ಲಾಹನ ಕೃಪೆ ಮತ್ತು ಶಾಂತಿಯಿರಲಿ) ತಲ್ಬಿಯ ಹೀಗಿತ್ತು: "ಲಬ್ಬೈಕ ಅಲ್ಲಾಹುಮ್ಮ ಲಬ್ಬೈಕ್, ಲಬ್ಬೈಕ ಲಾ ಶರೀಕ ಲಕ ಲಬ್ಬೈಕ್, ಇನ್ನಲ್-ಹಮ್ದ ವನ್ನಿಅಮತ ಲಕ ವಲ್-ಮುಲ್ಕ್, ಲಾ ಶರೀಕ ಲಕ್

ಹಜ್ಜ್ ಮತ್ತು ಉಮ್ರಾದಲ್ಲಿ ತಲ್ಬಿಯ ಹೇಳುವುದು ಧಾರ್ಮಿಕ ನಿಯಮವಾಗಿದೆ. ಅಷ್ಟೇ ಅಲ್ಲ ಅದು ಹೆಚ್ಚು ಒತ್ತುಕೊಡಲಾದ ವಿಷಯವಾಗಿದೆ. ಏಕೆಂದರೆ ಅದು ಅವುಗಳ ವಿಶೇಷ ಘೋಷಣೆಯಾಗಿದೆ. ತಕ್ಬೀರ್ ನಮಾಝಿನ ಘೋಷಣೆಯಂತೆ.
ಇಬ್ನುಲ್-ಮುನೀರ್ ಹೇಳಿದರು: ತಲ್ಬಿಯವನ್ನು ಧಾರ್ಮಿಕ ನಿಯಮವಾಗಿ ಮಾಡಿರುವುದರಲ್ಲಿ ಅಲ್ಲಾಹು ತನ್ನ ದಾಸರಿಗೆ ನೀಡುವ ಗೌರವದ ಕಡೆಗೆ ಸೂಚನೆಯಿದೆ. ಏಕೆಂದರೆ ಅವನ ಭವನಕ್ಕೆ ಅವರ ಆಗಮನವು ಅವನ ಆಹ್ವಾನದ ನಿಮಿತ್ತ ಮಾತ್ರವಾಗಿದೆ.
ಪ್ರವಾದಿಯವರು (ಅವರ ಮೇಲೆ ಅಲ್ಲಾಹನ ಕೃಪೆ ಮತ್ತು ಶಾಂತಿಯಿರಲಿ) ಕಲಿಸಿದ ತಲ್ಬಿಯವನ್ನು ಅವಲಂಬಿಸಿಕೊಳ್ಳುವುದು ಶ್ರೇಷ್ಠವಾಗಿದೆ. ಪ್ರವಾದಿಯವರು (ಅವರ ಮೇಲೆ ಅಲ್ಲಾಹನ ಕೃಪೆ ಮತ್ತು ಶಾಂತಿಯಿರಲಿ) ಅನುಮೋದಿಸಿದ್ದರಿಂದ ಹೆಚ್ಚುವರಿಯನ್ನು ಸೇರಿಸುವುದರಲ್ಲಿ ತಪ್ಪೇನಿಲ್ಲ. ಇಬ್ನ್ ಹಜರ್ ಹೇಳಿದರು: "ಇದು ಅತ್ಯಂತ ಸಮತೋಲಿತ ಮಾರ್ಗವಾಗಿದೆ. ಮರ್‌ಫೂಅ್ (ಪ್ರವಾದಿಯಿಂದ ವರದಿಯಾದದ್ದು) ಆಗಿ ಬಂದಿರುವುದನ್ನು ಪ್ರತ್ಯೇಕವಾಗಿ ಪಠಿಸಬೇಕು (ಅದನ್ನು ಇತರರ ಮಾತುಗಳಿಗೆ ಸೇರಿಸಬಾರದು). ಮೌಕೂಫ್ (ಸಹಾಬಿಯಿಂದ ವರದಿಯಾದದ್ದು) ಆಗಿರುವುದನ್ನು ಸ್ವೀಕರಿಸುವುದಾದರೆ, ಅಥವಾ ಅದಕ್ಕೆ ಹೊಂದಿಕೊಳ್ಳುವ ರೀತಿಯಲ್ಲಿ ಸ್ವತಃ ರಚಿಸಿದ್ದಾಗಿದ್ದರೆ, ಅದನ್ನು ಪ್ರತ್ಯೇಕವಾಗಿ ಹೇಳಬೇಕು. ಅದು ಮರ್‌ಫೂಅ್ ನೊಂದಿಗೆ ಬೆರೆಯದಂತೆ ನೋಡಿಕೊಳ್ಳಬೇಕು. ಇದು ತಶಹ್ಹುದ್ ಸಮಯದಲ್ಲಿ ಪ್ರಾರ್ಥಿಸುವುದಕ್ಕೆ ಸಮಾನವಾಗಿದೆ. ಅಲ್ಲಿ ಪ್ರಾರ್ಥಿಸುವುದರ ಬಗ್ಗೆ ಪ್ರವಾದಿಯವರು (ಅವರ ಮೇಲೆ ಅಲ್ಲಾಹನ ಕೃಪೆ ಮತ್ತು ಶಾಂತಿಯಿರಲಿ) ಹೇಳಿದರು: "ನಂತರ ಅವನು ತನಗೆ ಇಷ್ಟವಾದ ಸ್ತುತಿ ಮತ್ತು ಬೇಡಿಕೆಯನ್ನು ಆರಿಸಿಕೊಳ್ಳಲಿ." ಅಂದರೆ, ಮರ್‌ಫೂಅ್ ಆಗಿ ಬಂದಿರುವ ಪ್ರಾರ್ಥನೆಗಳನ್ನು ಪ್ರಾರ್ಥಿಸಿದ ನಂತರ.
ಪುರುಷರು ತಲ್ಬಿಯ ಹೇಳುವಾಗ ತಮ್ಮ ಧ್ವನಿಯನ್ನು ಎತ್ತುವುದು ಅಪೇಕ್ಷಣೀಯವಾಗಿದೆ. ಆದರೆ ಮಹಿಳೆಯರು, ಫಿತ್ನವಾಗಬಹುದೆಂಬ ಭಯದಿಂದ ತಮ್ಮ ಧ್ವನಿಯನ್ನು ತಗ್ಗಿಸಬೇಕು.