((قیامه‌ت ڕانابیت هه‌تا ڕۆژ ل ڕۆژئاڤایێ ده‌ردكه‌ڤیت، ڤێجا ئه‌گه‌ر ڕۆژ (ژ وی ڕه‌خی) ده‌ركه‌ڤت و خه‌لكی (ئه‌و ب وی سه‌روبه‌ری) دیت؛ هه‌می دێ باوه‌رییێ ئینن

پێغه‌مبه‌ر (صه‌لات و سه‌لامێن خودێ ل سه‌ر بن) ده‌نگوباسی ب وێ چه‌ندێ دده‌ت كو ئێك ژ نیشانێن قیامه‌تێ یێن مه‌زن ئه‌ڤه‌یه‌ ڕۆژ ژ ڕۆژئاڤایێ ده‌ركه‌ڤیت ل جهێ ل ڕۆژهه‌لاتێ ده‌ركه‌ڤیت و ب هه‌لێت، و ده‌مێ خه‌لك دبینن ڕۆژ یا ل ڕۆژئاڤایێ دهه‌لێت؛ هه‌می دێ باوه‌رییێ ئینن و موسلمان بن، به‌لێ ل ڤی ده‌می باوه‌ریئینانا كافری چ مفای ل وی ناكه‌ت و ل ڤی ده‌می نه‌ كارێ باش و نه‌ ته‌وبه‌كرن مفای ل خودانێ خۆ ناكه‌ن. پاشی پێغه‌مبه‌ری (صه‌لات و سه‌لامێن خودێ ل سه‌ر بن) به‌حسێ هندێ كر كو قیامه‌ت دێ ژ نیشكه‌كێڤه‌ هێت، هه‌تا وی ڕاده‌ی ئه‌و دێ ڕابیت و خه‌لك ب شوول و كارێن خۆ یێن ژیانا خۆ یا ڕۆژانه‌ڤه‌ د مژویلن، ڤێجا قیامه‌ت دێ ڕابیت و فرۆشیار و بكڕی جلكێ خۆ یێ به‌لاڤكری، به‌لێ نه‌ دشێن وێ كڕین و فرۆتنێ ب دویماهیك بینن و نه‌ دشێن وی جلكی جاره‌كا دی وه‌رپێچن، قیامه‌ت دێ ڕابیت و زه‌لامی شیرێ حێشترا خۆ یا شیرده‌ر یێ دۆتی و یێ گرتی، به‌لێ ناگه‌هیت ڤه‌خۆت، قیامه‌ت دێ ڕابیت و زه‌لام يێ حه‌وزا خۆ یا ئاڤێ یا نوژه‌ن دكه‌ت و يێ ته‌قنێ ل دۆرێن وێ دده‌ت، به‌لێ ناگه‌هیت ئاڤدانێ پێ بكه‌ت، قیامه‌ت دێ ڕابیت و زه‌لامی پارییێ خۆ یێ بلندكرییه‌ هنداڤ ده‌ڤێ خۆ دا بخۆت، به‌لێ ناگه‌هیت بخۆت.