((شه‌یتان دێ هێته‌ ده‌ڤ ئێك ژ هه‌وه‌ و دێ بێژیت: كێ ئه‌ڤ تشته‌ ئافراندییه‌؟ كێ ئه‌ڤ تشته‌ ئافراندییه‌؟ هه‌تا دبێژیت: پا كێ خودایێ ته‌ ئافراندییه‌؟ ڤێجا ئه‌گه‌ر مرۆڤ گه‌هشته‌ ڤێرێ؛ وی ده‌می بلا خۆ ب خودێ بپارێزیت و بابه‌تی ب دویماهیك بینیت))

پێغه‌مبه‌ر (صه‌لات و سه‌لامێن خودێ ل سه‌ر بن) به‌حسێ وی ده‌رمان و چاره‌سه‌رییا مفادار و كارتێكه‌ر دكه‌ت بۆ وان پرسیارێن شه‌یتان ب ڕێكا وان وه‌سوه‌سه‌یێ بۆ مرۆڤێ باوه‌ردار دروست دكه‌ت. ڤێجا شه‌یتان دێ بێژیت: كێ ئه‌ڤ تشته‌ ئافراندییه‌؟ كێ ئه‌ڤ تشته‌ ئافراندییه‌؟ كێ ئه‌سمان ئافراندییه‌؟ كێ ئه‌رد ئافراندییه‌؟ باوه‌ردار ژی ژ لایێ دینی و خورستی و ئه‌قلی دێ به‌رسڤا وی ده‌ت و بێژیت: خودێ یێن ئافراندین، به‌لێ شه‌یتان ل ڤی سنووری ڕاناوه‌ستیت بۆ وه‌سوه‌سه‌ دروستكرنێ، به‌لكی دێ هه‌ر چیت و به‌رده‌وام بیت هه‌تا دبێژیت: پا كێ خودایێ ته‌ ئافراندییه‌؟ ل ڤێرێ مرۆڤێ باوه‌ردار دێ ڤێ وه‌سوه‌سه‌یێ پاشڤه‌به‌ت و ب دویماهیك ئینیت، ئه‌ڤه‌ ژی ب ئه‌نجامدانا سێ تشتان:

باوه‌ریئینانا ب خودێ.

خۆپاراستنا ب خودێ ژ شه‌یتانی.

به‌رده‌وامی نه‌دان و ڕاوه‌ستيان ژ هزركرن و چوونا د ناڤ وه‌سوه‌سه‌یا شه‌یتانیدا.