((باوه‌ری حه‌فتێ و تشته‌ك - یان شێست و تشته‌ك - لقه‌، بلندترین و باشترین لقێ باوه‌رییێ گۆتنا (لَا إِلَهَ إِلَّا اللهُ)ـیه‌ و كێمترین لقێ باوه‌رییێ ژی لادانا وی تشتییه‌ ل سه‌ر ڕێكێ یێ نه‌خۆشییێ دگه‌هینیته‌ خه‌لكی

پێغه‌مبه‌ر (صه‌لات و سه‌لامێن خودێ ل سه‌ر بن) به‌حسێ هندێ دكه‌ت كو باوه‌ری گه‌له‌ك لق و پله‌ و خه‌سله‌ته‌، ئه‌ڤ لق و پله‌یه‌ ژ كریار و بیروباوه‌ر و گۆتنان پێك دهێن.

بلندترین و باشترین لقێ باوه‌رییێ گۆتنا (لَا إِلَهَ إِلَّا اللهُ)ـیه‌، ب وی مه‌رجی مرۆڤ ڕامانا وێ بزانیت و كار ب وی تشتی بكه‌ت یێ ئه‌ڤ گۆتنه‌ ل سه‌ر مرۆڤی فه‌ر دكه‌ت، كو ئه‌و ژی ئه‌ڤه‌یه‌ ئه‌لڵاھ ئێكێ ب تنێیه‌ و وی چ شریك نینن و هه‌ر ئه‌و ب تنێ یێ ژ هه‌ژی عیباده‌تییه‌ و ژ بلی وی ژ هه‌ژی نینن.

كێمترین كریارێن باوه‌رییێ ژی لادانا هه‌ر تشته‌كییه‌ كو نه‌خۆشییێ دگه‌هینیته‌ خه‌لكی ل سه‌رێن ڕێكێن وان.

پاشی پێغه‌مبه‌ری (صه‌لات و سه‌لامێن خودێ ل سه‌ر بن) به‌حسێ هندێ كر كو شه‌رم ژی لقه‌كه‌ ژ باوه‌رییێ، شه‌رم ژی ڕه‌وشته‌كه‌ دبیته‌ ئه‌گه‌رێ كرنا كارێن باش و جوان و هێلانا كارێن كرێت و پیس.