((هه‌ر كه‌سێ ده‌مێ گوهـ ل بانگهلدێری دبیت بێژیت: (أَشْهَدُ أَنْ لَا إِلَهَ إِلَّا اللهُ وَحْدَهُ لَا شَرِيكَ لَهُ، وَأَنَّ مُحَمَّدًا عَبْدُهُ وَرَسُولُهُ، رَضِيتُ بِاللهِ رَبًّا وَبِمُحَمَّدٍ رَسُولًا، وَبِالْإِسْلَامِ دِينًا، غُفِرَ لَهُ ذَنْبُهُ)، ئانكو: (ئه‌ز شاهده‌ییێ دده‌م كو ژ ئه‌لڵاهی پێڤه‌تر چ خودایێن ژ هه‌ژی په‌رستنێ نینن، ئه‌و ئێكێ ب تنێیه‌ و وی چ شریك و هه‌ڤال نینن و كو موحه‌ممه‌د عه‌بدێ خودێ و پێغه‌مبه‌رێ وییه‌، ئه‌ز ڕازی بووم خودێ خودایێ من بیت و موحه‌ممه‌د پێغه‌مبه‌رێ من بیت و ئیسلام ئایینێ من بیت)؛ گونه‌هێن وی دێ هێنه‌ ژێبرن))

پێغه‌مبه‌ر (صه‌لات و سه‌لامێن خودێ ل سه‌ر بن) مه‌ ئاگه‌هدار دكه‌ت كو هه‌ر كه‌سێ ده‌مێ گوهـ ل بانگهلدێری دبیت بێژیت: "أَشْهَدُ أَنْ لَا إِلَهَ إِلَّا اللهُ وَحْدَهُ لَا شَرِيكَ لَهُ"، ئانكو: ئه‌ز دانپێدانێ دكه‌م و دبێژم كو چ خودایێن ژ هه‌ژی په‌رستنێ نینن ژ بلی ئه‌لڵاهی و هه‌ر تشته‌كێ ژ بلی وی بهێته‌ په‌رستن؛ عیباده‌تێ وی یێ خه‌له‌ت و باتله‌. "وَأَنَّ مُحَمَّدًا عَبْدُهُ وَرَسُولُهُ"، ئانكو: ئه‌و عه‌بده‌ و عیباده‌تێ وی ناهێـته‌ كرن، پێغه‌مبه‌ره‌ و ناهێته‌ دره‌و ده‌رئێخستن. " رَضِيتُ بِاللهِ رَبًّا"، ئانكو: ب ڕبوبییه‌ت و ئولوهییه‌ت و باشناڤ و سالۆخه‌تێن وی، " وَبِمُحَمَّدٍ رَسُولًا"، ئانكو: ب وان هه‌می تشتێن ئه‌و پێ هاتییه‌ هنارتن و وی گه‌هاندینه‌ مه‌. " وَبِالْإِسْلَامِ"، ئانكو: ب هه‌می ئه‌حكامێن ئیسلامێ ژ فه‌رمان و پاشڤه‌برییان. " دِينًا"، ئانكو: ب باوه‌ری و سه‌رچه‌مییانڤه‌. " غُفِرَ لَهُ ذَنْبُهُ"، ئانكو: گونه‌هێن بچویك.