چونكی ئه‌ز ب خودێ كه‌مه‌ ئه‌گه‌ر خودێ ب ڕێكا ته‌ زه‌لامه‌كێ ب تنێ ب هیدایه‌ت بینیت؛ بۆ ته‌ باشتره‌ ژ هندێ كو حێشترێن سۆر (كو گرانترین مالێ عه‌ره‌بان بوو) بۆ ته‌‌بن

پێغه‌مبه‌ری (صه‌لات و سه‌لامێن خودێ ل سه‌ر بن) گۆته‌ صه‌حابییان كو سوباهی دێ موسلمان ب سه‌ر جوهییێن خه‌یبه‌رێ ب سه‌ركه‌ڤن و ئه‌و سه‌ركه‌ڤتن دێ ل سه‌ر ده‌ستێ زه‌لامه‌كی بیت كو دێ ئالا پێ هێته‌ دان، كو ئه‌و ئالایه‌ یێ له‌شكه‌ر وه‌ك نیشانه‌ك هه‌لدگریت. ئه‌و زه‌لامێ ئالایی هه‌لدگریت ژ سالۆخه‌تێن وی ئه‌ڤه‌یه‌‌ كو حه‌ز ژ خودێ و پێغه‌مبه‌ری دكه‌ت، خودێ و پێغه‌مبه‌ر ژی حه‌ز ژ وی دكه‌ن. صه‌حابییان هه‌می شه‌ڤا خۆ ب ئاخڤتنێ ل سه‌ر ڤێ چه‌ندێ بره‌ سه‌ری كا ئه‌ڤ ئالایه‌ دێ ب كێ هێته‌ دان؟ ئه‌ڤه‌ ژی وه‌ك حه‌زه‌ك ل ده‌ڤ وان بۆ ب ده‌ستڤه‌ئینانا ڤی قه‌در و بها و شه‌ره‌فا مه‌زن. ده‌مێ بوویه‌ سپێده‌، هه‌می چوونه‌ ده‌ڤ پێغه‌مبه‌ری (صه‌لات و سه‌لامێن خودێ ل سه‌ر بن) و هیڤی دكر ئه‌و بن یێن ڤێ شه‌ره‌فا مه‌زن دبه‌ن.

ئینا پێغه‌مبه‌ری (صه‌لات و سه‌لامێن خودێ ل سه‌ر بن) پرسیارا عه‌لییێ كوڕێ ئه‌بو طالبی (خودێ ژێ ڕازی بیت) كر.

گۆتنێ: ئه‌و یێ نه‌ساخه‌ و چاڤێن وی دئێشن.

ئینا پێغه‌مبه‌ری (صه‌لات و سه‌لامێن خودێ ل سه‌ر بن) كه‌سه‌ك فرێكره‌ ب دویڤڕا، پاشی ئه‌و ئینا، پێغه‌مبه‌ری (صه‌لات و سه‌لامێن خودێ ل سه‌ر بن) ژی هنده‌ك ژ تفا خۆ یا پیرۆز كره‌ د چاڤێن عه‌لیدا و دوعا بۆ كرن، ئینا چاڤێن وی چێبوون، دا بێژی چ ئێش تێدا نه‌بوون و ئالا دا ده‌ستێ وی و فه‌رمان لێ كر كو هێدی هێدی بچیته‌ نێزیكی كه‌لها دوژمنی و گازی وان بكه‌ت بۆ ئیسلامێ، ئه‌گه‌ر قه‌بویل كر؛ دێ فه‌ڕزێن ئایینی بۆ وان ڕوهن كه‌ت.

پاشی پێغه‌مبه‌ری (صه‌لات و سه‌لامێن خودێ ل سه‌ر بن) قه‌در و بها و خێرا گازییا بۆ ده‌ڤ خودێ بۆ عه‌لی ڕوهن كر و كو ئه‌گه‌ر گازیكار ببیته‌ ئه‌گه‌رێ هیدایه‌تا كه‌سه‌كێ ب تنێ، ئه‌ڤه‌ بۆ وی باشتره‌ ژ هندێ كو حێشترێن سۆر ب وی بهێنه‌ دان، ئه‌و حێشترێن كو گرانبهاترین مال بوون ل ده‌ڤ عه‌ره‌بان، ڤێجا چ ئه‌ڤ كه‌سه‌ وان حێشتران بۆ خۆ ڕاكه‌ت یان بكه‌ته‌ خێر و صه‌ده‌قه‌.