ឱរ៉ស៊ូលុលឡោះ! គ្មានបាបកម្មធំតូចណាមួយនោះឡើយ លើកលែងតែខ្ញុំបានប្រព្រឹត្តវា។ ណាពី ﷺ បានសួរថា៖ “តើអ្នកមិនបានធ្វើសាក្សីថា គ្មានទេម្ចាស់ដែលត្រូវគោរពសក្ការៈដ៏ពិតប្រាកដ មានតែអល់ឡោះ ហើយពិតណាស់មូហាំម៉ាត់ គឺជាអ្នកនាំសាររបស់អល់ឡោះទេឬ”?

មានបុរសម្នាក់បានទៅជួបណាពី ﷺ ហើយបាននិយាយថា៖ ឱរ៉ស៊ូលុលឡោះ! ជាការពិតណាស់ ខ្ញុំពិតជាបានប្រព្រឹត្តនូវអំពើបាប និងអំពើល្មើសគ្រប់បែបយ៉ាងទាំងអស់ ដោយគ្មានបាបកម្មតូច ឬធំណាមួយដែលខ្ញុំមិនបានប្រព្រឹត្តវានោះឡើយ។ ដូចនេះ តើគេ(អល់ឡោះ)អភ័យទោសដល់ខ្ញុំដែរឬទេ? ពេលនោះ ណាពី ﷺ ក៏បានសួរទៅបុរសនោះថា៖ តើអ្នកមិនបានធ្វើសាក្សីថា គ្មានទេម្ចាស់ដែលត្រូវគោរពសក្ការៈដ៏ពិតប្រាកដ មានតែអល់ឡោះ ហើយពិតណាស់មូហាំម៉ាត់ គឺជាអ្នកនាំសាររបស់អល់ឡោះទេឬ? លោកសួរដូចនេះចំនួនបីដង។ បុរសនោះបានឆ្លើយថា៖ បាទ ខ្ញុំបានធ្វើសាក្សីបែបនោះពិតមែន។ ពេលនោះ ណាពី ﷺ លោកបានប្រាប់បុរសនោះពីឧត្តមភាពនៃពាក្យសក្ខីកម្ម(ស្ហាហាហ្ទះ)ទាំងពីរនេះ ហើយនិងការជម្រុះចោលនូវអំពើអាក្រក់ទាំងឡាយ ហើយពិតណាស់ ការសារភាពកំហុស(តាវហ្ពាត់) គឺលុបលាងនូវបាបកម្មដែលមានពីមុនមក។