“ជាការពិតណាស់ សឡាតទាំងពីរនេះ(សឡាតស៊ូពុសនិងអ៊ីស្ហា) គឺជាសឡាតដែលមានលក្ខណៈធ្ងន់ធ្ងរបំផុតចំពោះពួកពុតត្បុត(មូណាហ្វិក)។ ប្រសិនបើពួកអ្នកបានដឹងពីផលបុណ្យដែលមាននៅក្នុងសឡាតទាំងពីរនេះ ពួកអ្នកប្រាកដជានឹងមកចូលរួមសឡាតទាំងពីរនេះជាមិនខាន ទោះបីជាត្រូវវារក៏ដោយ

ថ្ងៃមួយ ណាពី ﷺ បានសឡាតស៊ូពុស។ បន្ទាប់មក លោកបានសួរថា៖ តើម្នាក់នេះបានចូលរួមសឡាតជាមួយពួកយើងដែរឬទេ? សហាហ្ពាត់បានឆ្លើយថា៖ អត់ទេ។ ក្រោយមក លោកបានសួរអំពីមនុស្សម្នាក់ទៀតថា៖ តើម្នាក់នេះបានមកចូលរួមសឡាតដែរឬទេ? ពួកគេបានឆ្លើយថា៖ អត់ទេ។ ណាពី ﷺ លោកបានមានប្រសាសន៍ថា៖ ជាការពិតណាស់ សឡាតស៊ូពុស និងសឡាតអ៊ីស្ហា គឺជាសឡាតដែលមានលក្ខណៈធ្ងន់ធ្ងរបំផុតចំពោះពួកពុតត្បុត(មូណាហ្វិក) ព្រោះតែពួកគេខ្ជិលច្រអូសបំផុតក្នុងការមកសឡាតទាំងពីរនេះ និងដោយសារពួកគេពិបាកនឹងបង្ហាញឲ្យមនុស្សបានឃើញថា ខ្លួនបានចូលរួមសឡាតទាំងពីរនេះ ព្រោះជាពេលយប់ងងឹត។

ហើយប្រសិនបើអ្នកមានជំនឿទាំងឡាយបានដឹងពីផលបុណ្យបន្ថែមចំពោះការសឡាតស៊ូពុស និងសឡាតអ៊ីស្ហា(ព្រោះផលបុណ្យ គឺអាស្រ័យលើកម្រិតនៃភាពលំបាក) នោះពួកគេប្រាកដជានឹងមកចូលរួមសឡាតទាំងពីរនេះជាមិន ទោះបីជាត្រូវវារដោយដៃនិងជង្គង់ទាំងពីរក៏ដោយ។

ហើយជួរទីមួយដែលនៅកៀកនឹងអ៊ីម៉ាំ គឺប្រៀបដូចជាជួររបស់ម៉ាឡាអ៊ីកាត់ដែលនៅក្បែរអល់ឡោះជាម្ចាស់នោះដែរ។ ប្រសិនបើអ្នកមានជំនឿទាំងឡាយបានដឹងពីឧត្តមភាពនៃការសឡាតនៅជួរទីមួយ នោះពួកគេប្រាកដជានឹងប្រណាំងប្រជែង ឬដណ្តើមគ្នាទៅកាន់ជួរទីមួយជាមិនខាន។ ចំណែកការសឡាតរបស់បុរសម្នាក់ជាមួយបុរសម្នាក់ទៀត គឺទទួលបានផលបុណ្យច្រើនជាងការសឡាតម្នាក់ឯង ហើយការសឡាតជាមួយបុរសពីរនាក់ គឺប្រសើរជាងការសឡាតជាមួយបុរសម្នាក់។ ហើយសឡាតដែលមានមនុស្សចូលរួមច្រើន គឺអល់ឡោះស្រឡាញ់ជាង និងមានភាពល្អប្រសើរជាង។