Пак Къуръан

Сифте гаф
Гьямд хьуй Аллагьдиз – алемрин Рабби, Вичин Пак
Ктабда лагьай: «Гьакъикъатда, атанва квез Аллагьдин
патай нур ва ачух ктаб (Къуръан)!», ва салават ва салам
хьурай, пайгъамбаррикай ва расулрикай виридалайни
лайихлу ва гьуьрметлу тир чи Мугьаммад пайгъамбардиз,
вичини лагьай: «Виридалайни хъсанди квекай я вичи
Къуръан чирна ва ам масадбуруз чир авурди».
Кьилиз акъудун яз «Къадагъа алай кьве мискIиндин»
Къуллугъчи пачагь Салман ибн Абдульазиз аль-Сауда
(Аллагьди хуьрай вич) ганвай тапшуругъар: Аллагьдин
Ктабдин гьакъиндай къайгъу чIугун, ва регьят авун ам
виринриз чкIидайвал, ва ам пай авун рагъэкъечIдай
патани рагъакIидай пата вири мусурманрин арада, ва адаз
тафсир (баянар) гун, ва адан манаяр дуьньядин гьар жуьре
чIалариз таржума авун.
Ва гьакIни Арабрин Саудиядин Пачагьлугъда авай
«Исламдиз талукь крарин, диндиз эвер гунин ва хъсан рехъ
къалурунин крариз талукь тир» гьукуматдин идарадин
патай инанмишвал яз лазим ва герек тирди таржума
авун Къуръандин манаяр дуьньядин герек чIалариз; араб
чIалалай гъейри маса чIаларал рахазвай мусурманриз
регьят хьун патал адан гъавурда гьатиз, ва агакьарун
кьилиз акъудун яз Пайгъамбарди (Аллагьдин салаватарни
саламар хьуй адаз) эмирнавай кар: «Агакьара куьне зи
патай са аят кьванни».
Ва гьакIни къуллугъ авун яз чи стхайриз лезги чIалал
рахазвай, Нурлу Мединада авай пачагь Фагьдан тlварцlихъ
галай «Пак Къуръан чапдай акъуддай басмаханадиз» хуш я
теклиф ийиз гьуьрметлу кIелзавай касдиз и лезги таржума,
вич таржума авурди я гьуьрметлу шейх (алим кас) Ямингьажи (Ямен Мегьамедов), ва ахтармиш авурди я шейх
(алим кас) Гьашим-гьажи (Гьашум Мегьамедов).
Ва чна шукур гъизва Пак тир Аллагь Таладиз и чIехи
кардиз рехъ гайи ва куьмек авур, ва чна умудзава а кар
рикIин сидкьидай Аллагьдин рекье авунвай амал хьун, ва а
карди инсанризни менфят гун.
Гьакъикъатда, чаз чизва, Пак Къуръандин манайрин
таржума, гьикьван ам дуьзди (бегьемди) хьайитIани,
Къуръандин аятри къалурзавай вири манайриз адавай
акьалтIай баян гуз жедач. Ва таржумада къалурнавай
манаяр, ам анжах таржума авунвай касдин чирвилер
агакьнавай дережадин нетижа я Аллагьдин Пак Ктабдин
гъавурда гьатунин карда. Ва гьакъикъатда а таржумадик
акатун мумкин я, инсанрин амай вири крарик акатзавай,
гъалатIарни (хатаярни) нукьсанар.
Ва гьавиляй, чна тIалабзава, и таржума кIелзавай гьар са
касдивай, Нурлу Мединада авай пачагь Фагьдан тlварцlихъ
галай «Пак Къуръан чапдай акъуддай басмаханадиз» вичиз
жагъай гъалатIрикай, нукьсанрикай ва артухвилерикай
хабар гун; Аллагьди гайитIа (а теклифрикай, меслятрикай)
менфят къачудайвал дуьз хъувуна мад сеферра чапдай
ахкъуддайла.
Ва са Аллагь я гьар са карда куьмек ва агалкьунар
гузвайди, ва Ам я дуьз рекьел гъизвайди! Я (чи) Аллагь,
Кьабул ая Вуна чи патай (чи диндар, хъсан крар), бес
гьакъикъатда, Вун Вири Ванерин Ван Къведайди, Вири
Чидайди я эхир!
«Исламдиз талукь крарин, диндиз эвер гунин ва
хъсан рехъ къалурунин крарин» гьукуматдин идарадин
везир, «Къуръандин басмаханадин» кьилин регьбер тир
жанаби шейх, доктор Абдуллатиф ибн Абдульазиз ибн
Абдуррахман аль-Шейх