Гарәп язуына өйрәтү һәм “Амма” дҗүзе: китап рус телендә, төзүчесе – Хәйсәм Сәрхән. Китапның максаты – гарәп хәрефләрен акрынлап төрле торышта язарга күнектерү аркылы “нәсх” язу рәвешенә өйрәтү. Шуннан соң укучы гамәлияткә (практика) күчә һәм төрле дини эчтәлектәге текстларны күчереп яза. Китапның тагын бер максаты – “Амма” дҗүзен күчереп язу аркылы “госманлы” язу рәвешенә өйрәтү, Госман (Аллаһ аннан разый булсын) заманында китабыбыз Коръән әлеге язу рәвешендә язылган булган. Китап бик кызыклы һәм мавыктыргыч. Ул балаларга гына түгел, өлкән яшьтәге укучыларга да, гарәп телендә сөйләшүчеләргә генә түгел, әлеге телне бөтенләй белмәүчеләр өчен бик яхшы дәреслек.

Коръән - иң яхшы сөйләм, чөнки ул иң яхшы фәрештә (Җәбраил, галәйһи сәлләм) аша иң яхшы Расүл (Мөхәммәд, саләллаһу гәләйһи үәссәләм) йөрәгенә иң яхшы урында (Мәккә әль-Мөкәррәмә), иң яхшы вакытта (Рамазан ае), иң яхшы төндә (Кадер киче) һәм иң яхшы телдә (гарәп теле) иңдерелгән Аллаһ сүзе.
Аллаһ кешеләргә һәм җеннәргә Коръәнгә охшаш сүрә уйлап чыгарырга боерды, ләкин алар булдыра алмады. Аллаһ аның саклануын тәэмин итте, шуңа күрә гасырлар дәвамында беркем дә аңа һичнинди хәреф тә өстәп яза алмады һәм бу мөмкин эш тә түгел иде. Коръән 114 сүрәдән тора, “Фатиха” сүрәсе белән башлана, “Нәс” сүрәсе белән тәмамлана. Аллаһ Тәгалә Коръән укуны Үзенә якынайта торган гыйбадәт итеп кылды, “Бер хәрефен укыгыз, ул бер хәреф ун яхшы изгелеккә тиң”, - диде.