سرساه

چوں تو وتی روچگاں چہ کمی ءُ کوتاھی ءُ ردیاں چہ پاک ءُ پلگار کن ئے؟
چوں تو نادستر ءُ لاچارانی دلءَ شادِہ ءُ گل کن ئے دانکہ آ ائید روچءَ گَل ءُ شادِہ بہ بنت ہنچو کہ تو ماں ائید روچءَ گَلءُ شادِہ بئے؟!
کمکے اے حدیث سرءَ پِگر بہ کن
عبداللہ ابن عباس رضی اللہ عنہ گوشیت: کہ واجہ رسول اللہ صلی اللہ علیہ وسلمءَ سرساہ ءُ فطر فرض ءُ الّم کتگ، کہ آ روچگ دارءِ (داشتگیں روچگانی توکءَ) کُتگیں ردیاں پاک ءُ پلگار بہ کنت، ءُ پہ نادسترسءُ مسکیناں وراک ءُ وردن ئِے بہ بیت۔
ءُ سرساہ ءُ فطر ہر مسلمانءِ جند سرءَ فرض اِنت ءُ ہمے پیمءَ ہرچی کہ آئی دست چیرءَ کاینت ءُ آیانی ھرچ ءُ درچءِ ڈُبّاہ ہمائی سرءَ اِنت، چُش
کہ آئی جنین ءُ چُک۔
اگاں آئی کرّا چہ یک روچے کچءَ چہ گیش ورگ بوت پہ وتی ءُ وتی چکانی واستا۔ (گڈا آئی سرءَ الم اِنت کہ سرساہ بہ کشیت)
ءُ اے الّمءُ شرط نہ اِنت کہ آچہ وتی مالءَ یک گشینتگیں نصابی ءِ مالک بہ بیت۔ (چُش کہ زکاتءِ نصاب اِنت)
ءُ کَشّگی ئیں سرساہ ءِ کَچّ ءُ کساس پہ ہر مردمءَ واستا یک صاعے چہ ہما دان ءُ بَرءَ کَشّگ بہ بیت کہ مردم آئیءَ چِن اَنت ءُ پہ آیوکیں وھد واستا ائیر کن اَنت،
چُش کہ ناءُ ھرماگ بِرنج ءُ دال ۔
عبداللہ بن عمر رضی اللہ عنہ گوشیت:
کہ واجہ رسول اللہ صلی اللہ علیہ وسلمءَ سرساہ فرض ءُ الّم کتگ یک صاعے چہ نا ءُ ھرماگءَ یا چہ جَوءَ، ہر مسلمانءِ سرءَ آ توری غلامے بہ بیت یا آزات، بچکے بہ بیت یا جَنِک ءُ مزن بہ بیت یا کَسان۔
ءُ واجہءَ حکم داتگ سرساہ چہ مردمانی ائید نماز روگءَ چہ پیش دَر کَنگ ءُ دیگ بہ بنت۔
رمضانءِ گڈی روچءِ ائیر بُڈّگءَ گوں سرساہ مردم سرءَ واجب ءُ الّم بیت۔
ءُ جوانتر ہمش اِنت کہ ائید نماز روگءَ چہ پیش سرساہ کَشّگءُ دیگ بہ بنت۔
ءُ اگاں ائید ءَ چہ یک ءُ دو روچ پیش کَشّگ بوت ھم پروا نیست، بزاں 28 شپءَ، پرچہ کہ ماہ بوت کنت کہ 29 ءِ بہ بیت ءُ بوت کنت کہ 30 ءِ بہ بیت۔
ءُ ائید نمازءَ پد سرساہ دیگ روا نہ اِنت۔
ءُ ہرکسے کہ بید چہ عذرءَ ائید روچءَ وتی سرسایاں مہ کشّیت آ گناہ گار اِنت
ءُ آ سرءَ قضاء المی بیت، گڈا زوت پہ وش دلی ءُ ثواب ءُ مُز واستا سرسایاں وتیاں بہ کش اِت